Süni intellekt alətlərinin artıq bir çox avtomobil brendi tərəfindən istifadə olunduğu hərkəsə məlumdur. Lakin Volkswagen brendi indiyə qədər süni intellekt texnologiyalarından geniş istifadə etmirdi. İndi isə Volkswagen brendi rəsmi olaraq elan edib ki, ID, Tiguan, Passat və Golf avtomobilləri bu ilin əvvəlində, yaxın aylarda ChatGPT ilə təchiz ediləcək. Belə ki, alman avtomobil nəhəngi avtomobillərində istifadə etdiyi IDA səsli köməkçisinə məşhur süni intellekt alətini inteqrasiya edəcək. Bununla da Volkswagen avtomobilləri ilə səyahət etmək artıq daha maraqlı və əyləncəli olacaq.
Volkswagen bildirir ki, IDA səsli köməkçisinə inteqrasiya ediləcək ChatGPT ilə artıq həm sərnişinlər, həm də sürücülər təsəvvür edəcəkləri bütün sualların cavabını ala biləcək. Təhlükəsizlik tərəfinə gəldikdə isə alman avtomobil nəhəngi bildirir ki, ChatGPT inteqrasiyası avtomobil məlumatlarına girişi təmin etmir, məhz buna görə də istifadəçilərə məxsus heç bir şəxsi məlumat internetə çıxış imkanı əldə etməyəcək. Hətta, soruşulan bütün suallar dərhal silinəcək.
Volkswagen brendinin texniki inkişaf üzrə idarə heyətinin üzvü Kai Grunitz bildirib ki, “Volkswagen həmişə texnologiyanı demokratikləşdirib və bir çox insanlar üçün əlçatan edib. Bu bizim DNT-mizdə var. Nəticə etibarı ilə artıq bu innovativ texnologiyanı kompakt seqmentdən başlayaraq avtomobillər üçün standart funksiyaya çevirəcəyik”. Qeyd edək ki, ChatGPT inteqrasiyalı ilk avtomobillər bu ilin ikinci rübündən etibarən Avropa bazarlarında ortaya çıxacaq.
