Volkswagen hər keçən gün elektrikli avtomobillər sahəsində ixtisaslaşır. Belə ki, alman avtomobil nəhəngi bu dəfə ID.X Performance konseptini təqdim edib. Yeni elektromobil alman avtomobil nəhənginin ID.7 elektrikli modelinə əsaslanır. Lakin yeni konsept kar daha sürətli və daha performanslıdır. O cümlədən eksteryer tərəfində də idman üslublu incə toxunuşları görmək mümkündür. Ümumiyyətlə Volkswagen brendi son dövrlərdə elektrikli avtomobil seriyasına çox diqqət ayırır. Belə ki, brend avtomobil sahəsinin gələcəyini elektromobillərdə görür.
Yeni Volkswagen ID.X Performance konsepti eksteryer cəhətdən karbon materialları və idman üslublu görünüşü ilə diqqət çəkib. Belə ki, elektromobilin disklərindən tutmuş, bamperlərinə və spoylerinə qədər hərşey aqressiv görünür. Bundan əlavə eksteryer tərəfində qırmızı rəngli bəzi incə detallar da nəzərə çarpır. Ümumiyyətlə belə bir elektromobil modeli gələcək illərdə Volkswagen brendinin stendlərində görünəcək. Avtomobilin fara dizaynı demək olar ID.7 modelindən fərqlənmir. Sadəcə arxa və ön bamperlərdə və arxa spoylerdəki detallar bu iki modeli bir-birindən fərqləndirməyə imkan verir. Həmçinin interyer tərəfində sadə amma bir o qədər idman üslublu salon bizi qarşılayır. Eksteryerdə olduğu kimi interyerdə də qırmızı rəngli incə detallar diqqət çəkir. Habelə avtomobilin ön paneli sadəliyi ilə seçilir.
Texniki cəhətdən isə ID.X Performance modeli ID.7 modelindən 60 mm daha alçaqdır. Habelə ön təkərlərdə də 80 mm yaxınlaşma bucağı artıb. Bundan əlavə elektromobilin yerindən 100 km/saata sürətlənmək üçün dörd saniyədən az vaxt sərf etdiyi məlumdur. Yeni konsept karın elektrik mühərrikləri isə ümumilikdə 550 at gücü hasil edir. Batareya tərəfində isə 200 kVt-a qədər sürətli şarj xüsusiyyəti də bu modeldə öz yerini alır. Hələlik sözü gedən konseptin nə zaman istehsal versiyasında təqdim ediləcəyi məlum olmasa da, alman brendinin artıq ID.7 GTX adlı yeni model üzərində çalışdığı məlumdur.
