Tesla brendi yeni elektromobillərini təqdim edərkən onların təhlükəsizliyini göz önünə çıxarır. Lakin tədqiqatlar göstərir ki, Tesla sürücüləri ABŞ-da ən yüksək qəza nisbətinə sahibdir. Qeyd edək ki, CNBC mənbəsi tərəfindən paylaşılan LendingTree adlı araşdırmanın nəticələri göstərir ki, tesla vəd etdiyi təhlükəsizliyi təmin edə bilmir. Ümumiyyətlə Tesla brendinin avtopilot rejimi müasir və qabaqcıl funksiyalara sahib olması ilə diqqətləri cəlb edir.
Qeyd edək ki, analitiklər 2022-ci ilin noyabr ayının ortalarından 2023-cü ilin noyabr ayının ortalarına qədər olan qəza məlumatlarına əsaslanaraq Tesla sürücülərinin digər avtomobil sürücülərinə nisbətən daha yüksək qəza nisbətinə sahib olduğu bildirib. Statistikaya görə, ötən 1 il ərzində hər 1000 Tesla sahibindən 24-ü qəzaya uğrayıb. Siyahıda ikinci sırada 23 qəza ilə RAM sürücüləri və 21 qəza ilə Subaru sürücüləri gəlir. Mütəxəssislərin fikrincə, Tesla sürücülərinin problemi onların avtopilota həddən artıq etibar etmələri və yollardakı təhlükələrə məhəl qoymamaları ola bilər.
Maraqlısı budur ki, Tesla şirkətinin baş direktoru Elon Mask 2021-ci ildə Tesla sahibinin qəzaya düşmə ehtimalının digərlərindən on dəfə az olduğunu bildirmişdi. Lakin ortaya çıxan tədiqatlar avtopilotun heç də qəzaların önünə keçmədiyini ortaya çıxarıb. Bundan əlavə BMW sürücüləri sərxoş vəziyyətdə maşın sürərkən qəzalara daha çox məruz qalırlar və hər 1000 nəfərə üç qəza baş verir. Ötən günlərdə Tesla brendinin 2 milyondan çox elektromobili geri çağırdığı xəbəri də məhz bu hesabatla bağlı idi. Tesla avtopilot təhlükəsizlik sistemini yeniləyəcək.
