Dünyanın ən böyük texnologiya şirkətlərindən biri olan Apple, birbaşa olaraq iPhone modellərinə LLM dilini əlavə edə biləcək. Bildiyimiz kimi, ChatGPT kimi sistemlərin arxasında LLM yəni Large Language Model dayanır. Məsələn hazırda GPT-4 böyük dil modeli əsasında işləyir və Apple şirkəti də bununla bağlı mühüm işlər görür. Son məlumatlara görə isə texnologiya nəhəngi LLM-modelini birbaşa iPhone-larda işə salmağın yolunu aşkarlayıb.
Ümumiyyətlə LMM dil modelinin smartfona əlavə edilməsi onun internet bağlantısı olmadan süni intellekt alətləri ilə işləyə bilməsinə imkan verir. Lakin ChatGPT və Claude kimi LLM əsaslı çatbotlar inanılmaz dərəcədə məlumat və yaddaş tələb edir. Bu isə öz növbəsində iPhone kimi nisbətən kiçik yaddaş həcminə sahib olan cihazlar üçün mühüm problem hesab olunur. Görünən odur ki, Apple bu problemi həll edərək LLM dilini iPhone modellərinə əlavə etməyin yolunu tapıb.
Qeyd edək ki, yeni üsul məlumat ötürülməsini minimuma endirən və fləş yaddaşın ötürülməsini maksimuma çatdıran iki əsas texnikadan istifadə edərək məhdudiyyətləri aradan qaldıracaq. Bu texnikalardan biri Windowing, digəri isə Row-Column Bundling adlanır. Birincidə süni intellekt modeli hər dəfə yeni məlumatlar yükləmək əvəzinə, artıq emal etdiyi məlumatların bir qismini təkrar istifadə edir. İkincidə isə məlumatlar daha effektiv qruplaşdırılır və fləş yaddaşdan daha sürətli oxunur, yəni süni intellekt dili daha tez başa düşür və yaradır.
