Amerikanın nəhəng elektromobil istehsalçısı olan və hər zaman Elon Musk adı ilə yada düşən Tesla şirkəti yeni elektromobil hazırlayır. Belə ki, elektromobilləri ilə dünyada öz sözünü deyən şirkət, Model 3 elektromobilinin daha sadələşdirilmiş və daha ucuz versiyası olan Model Q şərti adlı elektromobilini hazırlayır. Şirkətin yeni elektromobil hazırlaması ilə bağlı iddia amerikanın məşhur sənaye mənbələri tərəfindən irəli sürülüb. Hətta onlar yeni elektromobilin bəzi xüsusiyyətləri və nə zaman təqdim olunacağı ilə bağlı iddialar da irəli sürüblər.
Yeni Tesla Model Q elektromobili hansı xüsusiyyətlərə sahib olacaq?
Sonuncu dəfə Model S Plaid elektromobilini təqdim edən Tesla, indi daha ekonom və kompakt elektromobil hazırlayır. Amerikanın sənayə mənbələri, şirkətin yeni elektromobili barədə iddialar irəli sürüb. Belə ki, şirkətin giriş səviyyəli elektromobilinin ucuz olmasına baxmayaraq yaxşı enerji tutumuna sahib olan CATL M3P fosfat batareyası ilə təchiz olunacağı iddia olunur. Yeni elektromobilin qiymətinin 30 min dollar civarında olacağı da iddialar arasındadır. Qeyd edək ki, bəzi mənbələrin iddiasına görə şirkətin hazırladığı yeni elektrikli avtomobil Tesla Model 2 yox, Model Q adlandırılacaq. Xatırladaq ki, 2021-ci ildə keçirilmiş tədbirdə Elon Musk özü də Model 2 adlı elektromobilin olmadığını qeyd etmişdi.
Teslanın yeni sərfəli elektromobilinin 2024-cü ildə istehsal ediləcəyi iddia olunsa da, elektromobilin ən tez 2025-ci ildə bazara çıxarılacağı gözlənilir. Əlavə olaraq qeyd edək ki, yeni elektromobil Çində yerləşən Gigafactory zavodunda istehsal olunacaq. Xatırladaq ki, ölkəmizdə bu yaxınlarda yeni elektrikli modellərin ƏDV-dən azad edilməsi ilə bağlı qərar qəbul olunmuşdu və Tesla elektromobilləri başda olmaqla elektromobillərin sayında gözlə görülən qədər ciddi artım müşahidə olunur.
