Bu gün elektromobillərin dayanıqlılığı hərkəsin düşündüyü mövzulardan biri hesab olunur. Yəqin ki, indi eşidəcəyiniz xəbərdən sonra isə elektromobillərin dayanıqlılığı və ya uzunömürlülüyü barədə ağlınızda bir fikir formalaşacaq. Belə ki, Almaniyada yaşayan Hansjorg Gemmingen-Hornberg adlı şəxs 2014-cü ildə aldığı Tesla model S elektromobili ilə 10 il boyunca 2 milyon kilometr yol qət edib. Hornberg öz hekayəsindən danışarkən qeyd edib ki, o 10 il boyunca elektromobilin mühərrikini 13 dəfə yeniləyib.
Hansjorg Gemmingen-Hornberg-in elektromobil ilə ilk hekayəsi 2014-cü ildə başlayıb. O, 2014-cü ildə sadəcə 30 min kilometr yol qət etmiş ikinci əl Tesla Model S elektromobilini bəyənərək alıb. Daha sonra isə Hornberg 5 il ərzində, yəni 2019-cu ilə qədər Tesla Model S ilə 1 milyon kilometr yol qət etməyi bacarıb. Maraqlısı budur ki, 5 il ərzində o elektromobilin mühərrikini nə az, nə çox 8 dəfə yeniləyib. Gemmingen-Hornberg hesab edir ki, nasazlıqların əsas səbəbi dizayn qüsurundan qaynaqlanır. Onun sözlərinə görə soyuducu maye elektrik mühərrikinə sızdığı üçün o tez-tez mühərriki yeniləmək məcburiyyətində qalıb.
Ümumiyyətlə Gemmingen-Hornberg taksi fəaliyyəti ilə məşğul olmadığını və sadəcə elektromobili ilə uzun səyahətlər etdiyini bildirib. Hətta o Afrikaya, Çinə öz elektromobili ilə səfər edib. 2019-cu ildən sonra növbəti 4 il ərzində isə almaniyalı Gemmingen-Hornberg elektromobilin mənzilini təxminən 2 milyon kilometrə çatıdırb. Hazırda 2014-cü ildə əldə etdiyi Tesla Model S 1,906,865 kilometr məsafə qət edərək dünyanın ən uzun ömürlü elektromobili də ola bilər. Lakin bu ünvana layiq olmaq Hornbergə 14 dəfə elektromobilin mühərrikini yeniləmək bahasına başa gəlib. Onun sözlərinə görə elektromobilin sadəcə mühərriki deyil, batareyası da mütəmadi olaraq dəyişilib, lakin dəqiq sayı məlum deyil.
