Elektrikli avtomobil bazarı gün keçdikcə inkişaf edir. Avtomobil nəhəngləri artıq sadəcə elektrikli SUV, sedan deyil, yük maşını da hazırlayır. Belə ki, dünyanın ən qabaqcıl avtomobil şirkətlərindən olan Mercedes-Benz yeni eActros 600 elektrikli yük maşınını təqdim edib. Beləliklə, Tesla Semi elektrikli yük avtomobili bazarında ön planda olmayacq. Artıq Mercedes brendinin eActros 600 modeli bütün diqqətləri öz üzərinə cəlb edib. Onu da qeyd edək ki, yük maşınlarının elektrikli ola bilməsinin ən böyük səbəblərindən biri yeni batareya texnologiyalarıdır.
Artıq Mercedes-Benz eActros 600 modeli elektrikli yük maşını bazarında Tesla Semi və Volvo elektrikli yük maşınları ilə rəqabətə girəcək. Onu da qeyd edək ki, bir çox insanın sevmədiyi düz dizayna sahib olan model, 22 ton yük daşıma qabiliyyətinə malikdir. Həmçinin ümumi tutumu 621 kVt/saat olan üç litium dəmir fosfat batareyası ilə yeni model 500 km-ə qədər məsafə təklif edir. Təbii ki, bir çoxlarına görə 500 km mənzil çox az görünsə də, Mercedes daha fərqli düşünür. Alman avtomobil nəhəngi bildirir ki, uzun səyahətlərin yarısından çoxu bu mənzilin altındadır. Məhz 500 km uzun səyahətlər üçün heçbir problem təşkil etmir.
Qeyd edək ki, Tesla brendinin Semi modeli 850 kVt/saat batareya həcminə sahibdir. O cümlədən elektrikli yük maşını tək şarj ilə 800 km məsafə qət edə bilir. Ümumiyyətlə son dövrlərdə bir çox elektromobil 1000 km mənzil vəd edir. Belə ki, yeni batareya texnologiyaları elektrikli yük maşınlarının daha böyük həcmdə batareya ilə təchiz edilməsinə şərait yaradır. O cümlədən batareyalar yüksək şarj sürətinə də malikdir. Gələcəkdə isə bu rəqəmlər daha da arta bilər.
