Chery, Apple ilə potensial ticarət nişanı münaqişəsinin qarşısını almaq üçün iCar brendinin adını dəyişməyə qərar verib. Xatırladaq ki, Apple şirkəti bir neçə ay əvvəl Apple Car layihəsinin baş tutmayacağını bildirənə qədər Chery əlini Apple-dan tez tutaraq avtomobil hazırlamış və onun adını iCar qoymuşdu. Təbii ki, bu ad bir çox müzakirələr səbəb olmuş və diqqətləri öz üzərinə cəlb etmişdi. Bu qədər böyüyən müzakirələrin sonunda işin məhkəmədə həll olunacağını əvvəlcədən görən Chery isə iCar adını dəyişərək Apple ilə savaşmaq riskinə girməyib.
Çin avtomobil nəhəngi Çindən kənar bazarlarda iCar əvəzinə “iCaur” adından istifadə edəcək. Chery-ni bu tədbiri görməyə vadar edən şey Apple-ın iCar adının hüquqlarına sahib olmasıdır. Apple-ın avtomobil layihəsi keçən il dayandırılsa da, Cupertinolu şirkəti hələ də ad hüququna sahibdir. Maraqlıdır ki, iCar brendi Çində də gözlənilən cazibəni qazana bilməyib. Chery zəif satış performansına görə iCar-ı müstəqil brenddən öz brendi altında model xəttinə keçirməyi planlaşdırır.
Yeni “iCaur” markası ilə beynəlxalq macəraya atılan ilk model, retro dizaynı ilə diqqət çəkən SUV tipli elektrik avtomobili V23 olacaq. Qeyd edək ki, bu model Böyük Britaniya bazarında satışa çıxarılacaq. Ümumiyyətlə, Chery-nin qlobal məqsədləri də kifayət qədər iddialıdır. Şirkət qarşıdakı üç il ərzində 100 ölkədə ümumilikdə 2000 səlahiyyətli diler açmağı hədəfləyir. Bu isə Çinli avtomobil nəhənginin qlobal bazara verdiyi önəmi bir daha ortaya çıxarır deyə bilərik.
