Ötən həftə render görüntülərini və bəzi texniki xüsusiyyətlərini sizlərlə bölüşdüyümüz Xiaomi Civi 2 modeli bu gün nəhayət təqdim edildi. Xioami Civi 2 modeli əvvəlcədən çoxlarınıza tanış olduğu üçün smartfonun dizaynı ilə bağlı bəzi yanlış fikirləri qeyd etməklə yazımıza başlamaq istərdik.
İlk növbədə ekran panelinin mərkəzinə quraşdırılmış ikili selfi kamerası oxşarlığı iPhone 14 seriyasından götürülməyib. Oxşarlıq cəhətdən müəyyən təsadüflər ola bilər. Lakin təqribi mart ayından bu cihazın təkmilləşdirmə mərhələsində olduğunu nəzərə alsaq, deməli smartfonda belə bir selfi kamerasının işlədilməsi qərarı ən az 8-9 ay əvvəldən verilib. Qeyd edim ki, ağlınıza “Dynamıc Island” interfeysi də gəlməsin, çünki, Xiaomi firması proqam təminatı cəhətdən belə bir yenilik gətirməyi planlaşdırmır. Sadəcə üçüncü tərəf tətbiqlər və ya xüsusi temalar ilə həmin funksiyanı bu cihaza quraşdıra biləcəksiniz.
Xiaomi Civi 2 modeli dizayn cəhətdən sələfi olan Civi 1 seriyasından xeyli fərqlənir. Xiaomi smartfonun dizaynında hər tərəfli dəyişikliklər edib. Arxa kamera modulundakı xırda dizayn elementləri Xiaomi 12 seriyasını uzaqdan xatırladır. Bir ədəd nəhəng kamera modulu daxilində də 2 fərqli kamera sensorunun quraşdırılması da xoş hissiyat yaradır. İlk baxışdan çox güclü kamera parametrlərinə sahib olduğunu düşünə bilərsiniz, lakin smartfonun dizaynı yanıldıcı bir hissiyat yaradır. Texniki cəhətdən kamera xüsusiyyətləri standart orta seqment cihazlarla eyni texniki imkanlara malikdir. Qeyd etməliyik ki, smartfon 7.23 mm qalınlığı və 171.8 qram çəkisi ilə olduqca erqonomikdir.
Smartfon öz gücünü Snapdragon 7 Gen 1 çipsetindən alır. Lakin performans cəhətdən Snapdragon 778G çipsetinin cüzi önündə performans göstərən Snapdragon 7 Gen 1 hələ də Snapdragon 870 çipsetinin çox gerisində qalır. Sırf Xiaomi Civi 2 timsalında qəribə olan bir faktor da var ki, smartfon UFS 2.2 və LPDDR4x yaddaş texnologiyalarını mənimsəyir. Ən azından UFS 3.1 və LPDDR 5 texnologiyaları fikrimizcə bu cihaza mütləq quraşdırılmalı idi. Göründüyü qədərilə, fərqli yerlərdə bəzi gücləndirmələr edən şirkət balansı bu detalla qorumaq qərarına gəlib.
Xiaomi Civi 2 modeli 6.55 düymlük 120Hz tezlikli qıvrımlı ekran paneli alıb. Sensor tezliyi isə (barmağın ekran tərəfindən qavranılması) 240Hz təşkil edir. Təsvir ölçüsü FHD+ olan ekran paneli 1920Hz PWM qaraltma, Dolby Vision, P3 rəng qamutu və.s kimi keyfiyyət standartlarına malikdir. Ekran panelinin özü Gorilla Glass 5 ilə qorunur.
Kamera konfiqurasiyasına gəldikdə Xiaomi Civi 2 modeli 50MP Sony IMX766 əsas, 20MP 115° ultra-geniş və 2MP makro sensorlarına malikdir. Təəssüf ki, arxa kamerada OIS və ya telefoto obyektivi kimi lazımi detallar mövcud deyil. Lakin selfi kameraları cəhətdən Xiaomi xeyli inkişaf edib.
Ön tərəfdəki kapsul daxilində 2 ədəd 32MP təsvir ölçülü kamera sensoru quraşdırılıb. Avtofokus dəstəkli selfi kameralarından biri 100° geniş baxış bucağına malikdir. Şirkət eyni zamanda müxtəlif selfi kamerası üçün özəlləşdirilmiş filterlerlər, VLOG modu kimi xüsusiyyətləri də yeni cihazı ilə birlikdə təqdim edib. Ön kamera ilə maksimum 1080P keyfiyyətdə 60FPS, arxa kamera ilə standart olaraq 4K keyfiyyətdə 30FPS videolar qeydə ala bilər. Əlavə olaraq ön tərəfdə 2 ədəd LED işıq da çərçivəyə inteqrasiya edilib ki, selfi kamerası ilə görüntülərin keyfiyyəti zəif işıqda müəyyən qədər arta bilər.
Smartfon 4500 mAs həcmli 67 Vt sürətli şarj dəstəkləyən batareya ilə təchiz edilib. Həqiqi stereo səs ucaldanlar quraşdırılmayıb, lakin səs sisteminin özü Dolby Atmos dəstəyinə malikdir.
Xiaomi Civi 2 modelinin qiyməti
Yeni Xiaomi Civi 2 modeli hələ ki, yalnız Çində satışa çıxarılıb. Qlobal bazara da gəlməsi nəzərdə tutulub, lakin hələlik hansı adla gələcəyi naməlumdur. Bu gün səhər saatlarında Xiaomi 12 Lite NE modeli sertifikasiya üçün onlayn olmuşdu. Bəlkə də həmin cihaz elə Xiaomi Civi 2 modelidir. Smartfonun Çindəki qiymətinə gəldikdə 8-128GB yaddaşa malik variantı 334$ başlanğıc qiyməti ilə təklif edilir. Ən bahalı 12-256GB yaddaşa malik variantı isə 390$ qiymət etiketinə sahibdir.
