Bu gün səhər IFA 2022 sərgisi timsalında ASUS şirkətinin hazırladığı tamamilə ekrandan ibarət noutbuku sizinlə bölüşmüşdük. Belə ki, dünyanın ən tanınmış ekran paneli istehsalçılarından biri olan LG, bu panelləri ən vacib məişət avadanlıqlarından birinə quraşdırmaq qərarı alıb. IFA 2022 sərgisində LG şirkəti olduqca mükəmməl görünən yeni nəsil LG MoodUP soyuduclarını nümayiş etdirib. LG mühəndisləri hamının evində mövcud olan soyuducular üçün adətən, yeni bir baxış bucağı qazandırıb.
Yeni LG MoodUP soyuducusunun LED ekranlı qapaqları 41 fərqli rəng seçiminə malikdir
Soyuducunun üst qapağı üçün 22, alt qapağı üçün isə 19 rəng seçimi təklif edilir. LG tərəfindən hazırlanmış ThinkQ tətbiqindən istifadə etməklə MoodUP soyuducusunun rənglərini dəyişə bilirsiniz. Əgər rəngi özünüz seçmək istəməsəniz “Season, Place, Mood, Pop” kimi hazır temalar arasında seçim etmək mümkündür. Məsələn, “Season” temasını seçdikdə qış ayındasınızsa soyuducunun qapağı mavinin tonlarında rəng alır.
Təbii ki, belə bir xüsusiyyətə malik soyuducu LED panellərdən fərqli məqsədlər üçün də istifadə edilə bilir. Əgər soyuducu tam bağlanmayıbsa LED işıqlar tez-tez yanıb sönərək sizi məlumatlandırır. Gecə vaxtı alt qapaqdakı LED panelin parlaqlığı “gecə rejimi” xüsusiyyəti vasitəsilə artırılır və soyuducunun işığı mətbəxi yüngül işıqlandırmağa kifayət edir.
Yeni LG MoodUP soyuducusu eyni zamanda bluetooth dəstəkli səs ucaldanlara sahibdir. Smartfonunuzu soyuducuya bağlayaraq mətbəxdə bir işlə məşğul olarkən eyni zamanda musiqi dinləyə bilərsiniz. Nəhəng LED panellər təxminlərimizə görə “Pop” rejimi daxilində musiqinin ritmlərinə görə rəng dəyişir. Tam olaraq hansı funksiyalar üçün nəzərdə tutulduğunu bilməsək də səs tanınması xüsusiyyəti də mövcuddur.
Sonda bir daha qeyd edək ki, bu LED panellər yalnız rənglər yarada bilir. Yəni ekran kimi istifadə etmək mümkün deyil. Soyuducuların bir neçə variantı olduğu məlumdur, amma çeşidlər rəsmi olaraq paylaşılmayıb. Eyni zamanda qiymət barədə də hələlik məlumat yoxdur. LED panellər söndürülüb, yalnız gecə rejimi xüsusiyyəti və.s üçün istifadə edilə bilər. Deyilənə görə LED işıqlar sönülü vəziyyətdə olduqda LG MoodUP modeli adi boz rəngli soyuduculardan fərqlənməyəcək.
