Kompüter və xüsusilə noutbuk bazarında vacib brendlərdən biri olan ASUS şirkəti dünyanın ilk 17 düymlük tamamilə ekrandan ibarət noutbukunu təqdim edib. Belə ki, ASUS Zenbook 17 Fold OLED modelinin nümayişi IFA 2022 sərgisi çərçivəsində baş tutub. Yeni Zenbook 17 Fold modeli tamamilə ekrandan ibarət qatlanan noutbuklar üçün adətən yeni bir dövrün başlanğıcı hesab edilir.
ASUS Zenbook 17 Fold OLED modeli çeşidli istifadə imkanı vəd edir
Dünyanın ilk 17.3 düymlük qatlana bilən OLED ekranlı Zenbook 17 Fold OLED modeli Windows əməliyyat sistemini ən çox əziyyətə salan noutbuk ola bilər. Çünki, bu model müxtəlif kombinasiyalara sahibdir. Məsələn, 90 dərəcə qatlayıb ekranın aşağı hissəsindən çıxan virtual klaviaturadan istifadə etmək mümkündür. Qutudan çıxan klaviaturanı isə 2 cür istifadə etmək olar. Əgər sadə noutbuk kimi işlətmək istəsəniz ekranı yenə 90 dərəcə qatlayıb ekranın üzərinə klavituranı yerləşdirə bilərsiniz. Lakin ASUS sizə klaviaturanı noutbukun üstünə qoymadan istər 90 dərəcə, istər 180 dərəcə tam açıq vəziyyətdə istifadə imkanı tanıyır. Yəni ağlınıza gələ biləcək bütün kombinasiyalar ASUS Zenbook 17 Fold OLED tərəfindən dəstəklənir. Hətta monoblok kimi də arxa tərəfdəki ayaqları açıb noutbuku işlətmək mümkündür. ASUS bütün bunlar üçün ScreenXpert 2 adlı proqram təminatı hazırlayıb. Eyni zamanda noutbukda barmaq izi saxlamayan ErgoSense adlı ekran örtüyü istifadə edilib.
Qatlana bilən noutbuk hansı texniki xüsusiyyətlərə malikdir?
Noutbukun ekranı açıq vəziyyətdə 17.3 düym ölçüyə malikdir. 2.5K təsvir ölçülü 0.2ms gecikmə müddətinə sahib qatlanan OLED panelin görüntü yeniləmə tezliyi 60Hz təşkil edir. Dolby Vision, PANTONE, P3 rəng qamutu standartlarına və TÜV Rheinland sertifikatına malikdir. Yarımçıq qatlanmış vəziyyətdə isə 12.5 düymlük kompakt noutbuk kimi davranır. ASUS Zenbook 17 Fold OLED modelinin əsas xüsusiyyəti 30.000 qatlanmaya qədər davamlı olmasıdır. Bu isə gündə 15 dəfə açıb bağlasanız 5 ildən çox problemsiz işləyəcək deməkdir. Bəzilərinə görə bu rəqəm az, bəzilərinə isə normal görünür.
ASUS Zenbook 17 Fold OLED modeli öz gücünü Intel Core i7-1250U prosessorundan alır. Modifikasiyaları bəlli olmasa da ən üst variantı 16GB RAM və 1TB PCIe SSD ilə təchiz edilməlidir. Intel Iris Xe daxili qrafik kartından başqa xarici bir qrafik kartı mövcud deyil. 75 Vts batareyaya və 65 Vt güc adapterinə sahibdir. 2 ədəd yüksək sürətli Thunderbolt 4 USB-C girişi mövcuddur.
İstehsalçı bu modelə ASUS Adaptive Lock və digər xüsusiyyətlərin işləməsi üçün infraqırmızı HD kamera quraşdırıb. Həm təhlükəsizlik, həm də istifadəçi noutbukdan uzaqlaşdıqda yuxu rejiminin avtomatik aktivləşməsi üçün və.s bu xüsusiyyətdən istifadə edilə bilər. Eyni zamanda 5MP AI kamera və ASUS 3D Reduction texnologiyaları da mövcuddur. Bu texnologiyalar görüntü keyfiyyətinin rəqəmsal olaraq artırılması üçün və.s onlayn görüşlərdə işə yarayacaq.
Səs keyfiyyətinə ciddi əhəmiyyət verən ASUS şirkəti Zenbook 17 Fold OLED modelinə rəqib markalardakı səs ucaldanlar ilə müqayisədə 3.5 dəfə daha yüksək səs və səs keyfiyyəti verən xüsusi bir səs sistemi quraşdırıb. Noutbukun ağırlığı klaviatura olmadan 1.5 kq təşkil edir, klaviaturanı arasına yerləşdirsəniz 1.8 kq təşkil edir.
Bu ilin sonundan etibarən satışa çıxarılacaq modelin qiyməti 3500$ təşkil edəcək.
