İstehlakçılar performansdan çox danışsa da AMOLED ekran, 108MP kameralar onların diqqətini daha çox çəkir. Yəqin ki, elə bu səbəbləri araşdırmış firmaların əksəriyyəti son vaxtlar güclü çipsetləri nisbətən zəif komponentlərlə birləşdirib bazara çıxarmaqda maraqlı deyillər. Bu sahədə ən çox tanınmış istehsalçı Xiaomi və onun qlobal bazardakı əsas alt brendi POCO belə 1 ildir bu prinsipə uyğun smartfon hazırlamır. POCO X3 Pro modelində Snapdragon 860 çipsetini 120Hz IPS LCD ekranla birləşdirən brend cihazı təqribi 250$ səviyyələrində satışa çıxarmışdı. Xüsusilə oyun həvəskarlarının və həqiqətən performansa əhəmiyyət verənlərin diqqətini çəkən model brendə yüksək satış ədədləri qazandırmışdı. Lakin POCO X4 Pro modeli bir çoxları üçün bərbad bir davamçı oldu. İstifadəçilər POCO brendindən eyni prinsiplə hazırlanmış münasib qiymətli performans modeli gözləyirdilər. Sevinə bilərsiniz, çünki Xiaomi sizi eşidib və POCO X3 Pro modelinin layiqli davamçısı olan Dimensity 8100 çipsetli POCO X4 GT modelini 23 iyunda təqdim ediləcək.
POCO X4 GT modeli POCO X3 Pro ilə müqayisədə nə qədər güclüdür?
İlk olaraq qeyd etmək lazımdır ki, POCO X4 GT modeli ötən ay təqdim edilmiş Redmi Note 11T Pro modelinin təkrar brendləşdirilmiş versiyasıdır. POCO X4 GT modeli performansa üstünlük verən bir model olduğundan cihazda işlədilən Dimensity 8100 çipsetinin Snapdragon 860 ilə fərqinə baxmaq lazımdır. Təbii ki, biraz mənasız bir fərq olacağını indidən qeyd etməliyik. Səbəbi isə Dimensity 8100 çipsetinin bazardakı ən ideal çipsetlərdən biri olmasıdır.
Dimensity 8100 çipseti Mediatek mühəndisliyinin zirvəsi hesab edilə bilər! Necə?
Dimensity 8100, bir növ Snapdragon 888 çipsetinin zəif nöqtələri hədəf alınaraq hazırlanıb. Snapdragon 888 çipsetinin zəif nöqtələri nə idi deyə soruşsanız Samsung əsaslı 5nm istehsal prosesi və yüksək enerji sərf edən Cortex-X1 nüvəsindən bəhs edirik.
Mediatek, Dimensity 8100 çipsetini hazırlayarkən CPU arxitekturası üzərində mükəmməl bir dəyişiklik etdi, istehsal prosesi olaraq da TSMC-nin 5nm texnoloji prosesindən yararlandı.
Arxitektura üzərindəki möhtəşəm dəyişiklik isə Cortex-X1 nüvəsinin yerinə 4 ədəd yüksək tezlikli Cortex-A78 nüvəsinin işlədilməsi idi. Beləliklə 4 ədəd Cortex-A78 nüvəsi 2.85GHz tezliyə çıxarıldı. Buna qarşılıq Snapdragon 888 çipsetində 1 ədəd Cortex-X1 nüvəsini 2.84GHz tezlikdə, 3 ədəd Cortex-A78 nüvəsi 2.42GHz tezlikdə işləyirdi. Nəticədə performans ideal səviyyədə balanslaşdırıldı, enerji sərfiyyatı azaldı, performans davamlılığı isə təəccübləndirici dərəcədə Snapdragon 8 Gen 1 çipsetini belə uzun müddətli yük altında istifadə zamanı keçəcək həddə çatdı.
Şirkət çipseti yeni nəsil Cortex-A710 arxitekturasına üzərində inkişaf etdirə bilərdi. Performans cəhətdən lap güclü olacaqdı, amma Cortex-A78 ilə müqayisədə Cortex-A710 yenə enerji sərfiyyatına görə arzu olunmaz nəticələr verəcəkdi.
Dimensity 8100 çipseti testlərdə nə nəticə göstərir?
Üstdə Dimensity 8100, Snapdragon 888, Snapdragon 870 çipsetlərinin Geekbench nəticələrini görə bilərsiniz. Təkli nüvə performansı Snapdragon 870 və Snapdragon 888 çipsetlərində yüksəkdir. Çünki, hər ikisində də bir ədəd yüksək performans nüvəsi mövcuddur və tezlikləri xeyli yüksəkdir. Biri 3.2GHz tezlikli Cortex-A78 ilə, digəri 2.84GHz tezlikli Cortex-X1 ilə önə çıxır.
Dimensity 8100 çipseti isə daha yaxşı texnoloji proses və dörd ədəd 2.85GHz tezlikli Cortex-A78 vasitəsilə çoxlu nüvələrin testində digər 2 çipseti xeyli üstələyir. Enerji sərfiyyatı dəyərləri isə o qədər mükəmməldir ki, bir sözlə insanı valeh edir. Aşağıda Golden Reviewer tərəfindən hazırlanmış enerji sərfiyyatı, vatt/performans cədvəlini görəcəksiniz. Sütunun ən soluna Snapdragon 888 çipsetinin top performansına baxdıqda 20% yüksək nəticə göstərdiyi ilə qarşılaşırsınız. Yəni 42,78 xallıq nəticəyə 3,04 vatt enerji sərf etmiş olursunuz. Sadə bir riyazi hesablama göstərir ki, 1 vatt enerji sərf edərək Snapdragon 888 çipseti 14,07 xallıq performans göstərə bilir.
Lakin Dimensity 8100 çipsetində top performans biraz az olsa da enerji sərfiyyatı tam olaraq 2,2 qat daha aşağıdır. Nəticədə bayaqkı üsulla hesabladıqda 1 vatt enerji sərf edən Dimensity 8100 çipseti 24,59 xallıq performans göstərir ki, vatt/performans dəyərlərinə görə bazardakı bütün çipsetləri Snapdragon 8 Gen 1, hətta Dimensity 9000 çipsetini belə geridə qoyur. Təbii ki, Snapdragon 8+ Gen 1 çipsetini kənara qoysaq. Çünki, hələ heç bir cihazda mövcud deyil.
Qrafik çipin performansından indiyə qədər heç bəhs etmədik. Çünki, elə sadə Antutu nəticələrində GPU hissəsinə baxdıqda Dimensity 8100 çipsetindəki Mali-G610 MC6 çipinin Snapdragon 870 ilə xeyli fərq yaratdığını görmək mümkündür. Qrafik çipin performansı Snapdragon 888 çipsetinə çox yaxındır.
Nəticədə POCO X4 GT modeli oyunlar üçün ideal seçim ola bilər!
Top performansa hər zaman güvənməyin. Bir çipset ən yüksək performansı stabil olaraq saxlaya bilmirsə, əslində performansın nə qədər yüksək olmasının bir mənası yoxdur. Dimensity 8100 optimal performansa və ideal enerji sərfiyyatına malikdir deyə isinmə problemləri də dolayı olaraq daha azdır. Ona görə oyunlarda performans davamlılığı cəhətdən yenə ağlınıza gəlməyən nəticələr ortaya qoyacaq.
Gördüyünüz kimi, Redmi K50 modelində işlədilmiş Dimensity 8100 çipseti Genshin İmpact oyununda ortalama FPS (AVG FPS) dəyərlərinə görə yenə digər Android çipsetləri qəribə şəkildə üstələyir. Performansını stabil və davamlı formada saxlamağı bacarır. Böyük bir ehtimalla bütün bu nəticələrdə TSMC əsaslı istehsal prosesi xüsusi rola malikdir. Düşünürük bütün bu yazdıqlarımızdan sonra geri çevrilib POCO X3 Pro modelindəki Snapdragon 860 çipsetinə baxmağa artıq ehtiyac qalmayacaq.
POCO X4 GT modelinin digər texniki xüsusiyyətləri
POCO X4 GT modelinin digər texniki xüsusiyyətlərinə də qısaca nəzər salaq. Smartfon 144Hz tezlikli IPS LCD ekran paneli ilə təmin ediləcək. 64MP əsas, 8MP ultra-geniş bucaqlı, 2MP makro kameralarına sahib olacaq. 67W sürətli doldurma dəstəkləyən 5080mAh batareya quraşdırılacaq. Təqdimata isə sadəcə 3 gün qalıb. Əlavə olaraq POCO F4 5G modeli də eyni təqdimatda debüt edəcək. Aşağıdan POCO F4 5G barədə daha çox məlumat ala bilərsiniz.
