Redmi brendi orta seqment üçün nəzərdə tutulmuş yeni modellərini təqdim edib. Əslində tanıdılmış olan Redmi Note 11T Pro modellərini sahib olduqları yüksək performanslı çipsetə görə orta seqment adlandırmaq doğru olmaz. Lakin smartfonların qiyməti 270-370$ arasında dəyişdiyindən bu aralıq orta seqmentə daha uyğundur. Yüksək performanslı deyə bəhs etdiyimiz çipsetin Dimensity 8100 olduğunu çoxlarınız yəqin ki, təxmin edib. Artıq 2 həftədir əksər təqdimatlarda Mediatek istehsalı bu çipset müxtəlif qiymət səviyyələrində qarşımıza çıxır. Bəs bu çipsetin işlədildiyi Note 11T Pro və Note 11T Pro+ modelləri bizə hansı yenilikləri gətirir?
Note 11T Pro | Note 11T Pro+
Note 11T Pro və Note 11T Pro+ modelləri 2 ayrı smartfon kimi tanıdılıb. Amma bu smartfonlar tamamilə eyni gövdəyə, hətta 90% eyni texniki xüsusiyyətlərə sahibdirlər. Redmi brendi sadəcə batareya və 120W sürətli enerji ilə doldurma qabiliyyətinə görə smartfonları fərqləndirir. Cihazlar baxarkən valeh ola biləcəyiniz mükəmməl bir dizayna sahib deyillər. Yalnız Note 11T Pro+ modelinin Astro Boy adlı xüsusi buraxılışı arxa qapaq üzərindəki işləmələrlə biraz fərqlənir. Modellərin görünüşü ilə aşağıdakı qalareya hissəsindən tanış ola bilərsiniz.
Modellər 6.6 düymlük adaptiv 144Hz tezlikli IPS LCD ekran paneli əldə ediblər. FHD+ təsvir ekran 240Hz sensor tezliyinə malikdir. Modellərin 270$ səviyyəsinə qədər enməsinin əsas səbəblərində biri budur. IPS LCD ekran panelinin qiymətə müsbət təsir etdiyi başa düşmək olar. Lakin ekranın çənə qismindəki qalınlıq az ola bilərdi. Ekran panelinin özü DiplayMate tərəfindən A+ ilə qiymətləndirilib, HDR10, P3 rəng qamutu, Dolby Vision kimi keyfiyyət standartlarına malikdir.
Smartfonun Dimensity 8100 çipsetinə sahib olduğunu təkrar deməyə ehtiyac olmadığını düşünürük. Performansın ön planda olduğu modellərdir deyə UFS 3.1 və LPDDR5 texnologiyalarına modeldə yer verilməsi diqqətlərdən yayınmır.
Arxa tərəfdəki kamera modulu daxilində 64MP təsvir ölçülü 1/1.72 düymlük ISOCELL GW1 sensoru işlədilib. Digər 2 kamera isə 8MP 120° ultra-geniş bucaqlı, 2MP makro sensorlarından ibarətdir. Selfi kamerası 16MP-dir.
Redmi Note 11T Pro modelində 5080mAh həcmli 67W, Redmi Note 11T Pro+ modelində 4400mAh həcmli 120W sürətli doldurma dəstəkləyən batareya işlədilib. Simmetrik həqiqi səs ucaldanlara malikdir. Yəni üst hissədə aşağıdakı ilə eyni fiziki səs ucaldan yerləşdirilib. Hi-Res Audio sertifitkatına sahibdir və Dolby Atmos dəstəkləyir. IP53 qorumasına malikdir. Qlobal bazara cihazların POCO X4 GT, POCO X4 GT Pro olaraq gəlməsi gözlənilir. Üstəlik POCO X4 GT Pro (Redmi Note 11T Pro+) modelinin 108MP kameraya yüksəldiləcəyi Kacper Skrzypek adlı insayder tərəfindən bildirilir.
Redmi Note 11SE
Redmi Note 11SE modeli uzun müddətdir qlobal bazarda olan POCO M3 Pro 5G modelinin təkrar brendləşdirilmiş variantıdır. 6.5 düymlük 90Hz tezlikli IPS LCD ekrana, Dimensity 700 çipsetinə sahibdir. 48MP əsas, 2MP makro sensorları ilə arxa kamera tamamlanır. 8MP selfi kamerası ilə təchiz edilib. 5000mAh batareyası 18W sürətli doldurma dəstəkləyir. Android 11 üzərinə MIUI 12.5 interfeysi ilə qutudan çıxır.
Smartfonların qiymətinə gəldikdə Note 11SE modelinin 4-128GB başlanğıc versiyası 165$, Note 11T Pro modelinin 6-128GB başlanğıc versiyası 270$, Note 11T Pro+ modelinin 8-128GB başlanğıc versiyası 315$ təşkil edir.
