Ötən gün Xiaomi şirkəti Redmi alt brendinə aid smartfonların təqdimatını keçirmişdi. Təqdimat tədbiri çərçivəsində Xiaomi Mi Band 7 və Redmi Buds 4 seriyası qulaqlıları da təqdim edildi. Əslində Mi Band 7 ağıllı saatını Xiaomi Band 7 olaraq adlandırmalıyıq. Lakin illərin formalaşdırdığı Mi adını daşıyan smartfonlar ilə müqayisədə ağıllı saatlarda bunu tərgitmək biraz çətindir. Smartfonlar tez-tez çıxarıldığından Mi adının olmamasına insanlar müəyyən qədər öyrəşib. Xiaomi Band seriyası ildə bir dəfə yeniləndiyi üçün Mi adını unutmaq biraz vaxt tələb edəcək. Hətta Çin dilindən ağıılı saatla bağlı heşteqləri tərcümə etdikdə, eyni yazının Çin dilindən Xiaomi Band 7 və ya Xiaomi Mi Band 7 kimi 2 fərqli adla çevrildiyi ilə qarşılaşmaq mümkündür. Gəlin elə Xiaomi Band 7 ilə danışmağa başlayaq və daha sonra Redmi Buds 4 seriyası barədə məlumat verək.
Xiaomi Band 7
Xiaomi Band 7 modeli hər il olduğu kimi ekranın böyüməsi ilə önə çıxıb. Ötən il tanıdılmış Xiaomi Band 6 ilə müqayisədə 1,62 düymlük ekran əldə edib. Hansı ki, 1.56 düymlük ekrandan edilən yüksəltmədən söhbət gedir və Xiaomi ekranın 25% böyüdüyünü iddia edir. AMOLED ekran paneli işlədilib. 490×192 piksel təsvir ölçüsünə malikdir. 120-dən çox yeni ekran, saat dizaynını və zövqünüzə görə özəlləşdirmələr edilməsini dəstəkləyir. “Always On Display”, yəni həmişə açıq ekran xüsusiyyəti mövcuddur.
Qandakı oksigen miqdarını ölçə bilir. Əgər qanınızda oksigenin miqdarı 90%-dən az olara sizə bu barədə bildiriş göndərilir və eyni zamanda Xiaomi Band 7 modeli qolunuzda titrəyir. Yuxu səviyyəsini, addım sayını hesablaya bilir. Hərəkət zamanı nə qədər kalori itirdiyinizi göstərir. 120 fərqli idman hərəkətini dəstəkləyərək sizin üçün ağıllı məşqçi rolunu oynayır.
180mAh batareyaya sahib cihaz 14 gün işləyə bilər. Lakin həmişə açıq ekran rejimi qapalı olmalıdır. Enerji ilə doldurulması 2 saat çəkir. NFC dəstəkləyən versiyası vardır. Android 6.0 və iOS 10 üzəri smartfonlarla işləyir. Çəkisi 13 qram olub, 5ATM təzyiqə dayanıqlıdır. Zepp tətbiqi ilə vasitəsilə ağıllı saat daha çox müdaxilə edə bilərsiniz.
Qiymətinə gəldikdə NFC dəstəyinə sahib variantı 45$, sadə variantı 37$ qiymətə təklif edilir. Ön sifariş endirimləri mövcuddur.
Redmi Buds 4 seriyası
Xioami istehsalı Buds qulaqlıqları ölkəmizdə də məşhurdur. Belə ki, Redmi Buds 4 və Redmi Buds 4 Pro modelləri ötən gün debüt edib. Buds 4 Pro modeli ətrafdakı səs-küyün izolyasiyası (ANC) xüsusiyyətini dəstəkləyir. Buds 4 Pro qulaqlığı 43dB-ə qədər səs-küy təsirini azaldacaq. Sadə Buds 4 modelində də belə bir xüsusiyyət var. Lakin Pro modeldəki kimi güclü deyil. 43dB ilə müqayisədə sadəcə 35dB səs təsirini azaltma imkanına malikdir. Buds 4 Pro qulaqlıqları IP54 standartına görə su sıçramalarına və toza qarşı dayanıqlıdır. Birbaşa su təsirinə dayanıqlı deyil. Sadə Buds 4 modelində bu standart yoxdur. Bluetooth 5.3 dəstəyi ilə Buds 4 Pro modeli sadəcə 59ms gecikmə müddətinə sahibdir ki, oyunlar üçün idealdır. Hi-Fi ilə səs keyfiyyəti yüksəkdir. Hər ikisi qabı ilə birlikdə 30 saat işləyə bilər. Buds 4 Pro modelində ANC xüsusiyyətini açmasanız 9 saata qədər fasiləsiz işlədə bilərsiniz. Buds 4 modelinin qiyməti 29$, Buds 4 Pro modelinin qiyməti 55$ olacaq.
