Smartfon bazarında rəqabət gücləndikcə Samsung şirkəti atdığı yanlış addımlar səbəbilə gələcəkdə müəyyən problemlərlə qarşılaşa bilər. Bir il geri getsək Galaxy S21 seriyası ilə birlikdə Exynos 2100 platforması Snapdragon 888 ilə müqayisədə bərabər səviyyəyə demək olar çatmışdı. Lakin AMD əməkdaşlığında hazırlanmış Exynos 2200 çipseti gözlənildiyi qədər güclü olmadı. İstər enerji sərfiyyatı, istər performans cəhətdən Snapdragon 8 Gen 1 çipsetli variantından müəyyən qədər geri qaldığını təəssüf ki, inkar edə bilmərik. Bunları kənara qoysaq, Samsung Semiconductor inc. alt şirkətinin çip istehsalı mühəndisliyində effektiv olmaması Qualcomm kimi nəhəngin müəyyən qədər itirilməsi ilə nəticələndi. Bir neçə gün əvvəl çıxarılmış Snapdragon 8+ Gen 1 çipseti TSMC əsaslı istehsal prosesi ilə bazara adətən Snapdragon 8 Gen 2 küləyi əsdirdi. Snapdragon 8+ Gen 1 çipsetli test nümunələrindən əldə edilən sintetik test nəticələri Samsung-un 4nm istehsal prosesindəki vəziyyətin yaxşı olmadığını bir daha sübut etdi. Vəziyyət getdikcə daha da çətinləşir və Samsung şirkəti digər sektorlara daha çox yatırım edərək fərqli hissələrdə gücünü artırmağı planlaşdırır.
Samsung şirkətinin hədəflərinə çiplər, biotexnologiyalar və süni intellekt daxildir
Samsung şirkəti qarşıdakı 5 il ərzində həyata keçiriləcək böyük bir yatırım planı barədə açıqlama verib. Şirkət 2026-cı ilə qədər 80.000 nəfər yeni kadr qəbul edəcək. Müxtəlif sektorlara 450 trilyon KRW (356 milyard dollar) dəyərində yatırım ediləcək. Bu, şirkət tarixindəki ən böyük yatırım hesab edilir. Verilən məlumata görə, şirkətin ilk hədəfi çip istehsalı texnologiyalarını yaxşılaşdırmaqdır. Hazırlıq mərhələsində olan 3nm istehsal prosesinə əsaslanan çipləri, TSMC-nin 3nm texnoloji prosesi ilə müqayisədə zəif qaldığına dair bəzi iddialar mövcuddur. Samsung bu problemləri həll etməyə fokuslana bilər.
Digər hədəflərə isə biotexnologiyalar və süni intellekt daxildir. Şirkət bütün dünyada çiplərdən sonra həyati əhəmiyyətə malik ikinci bir sektorun tibb ilə bağlı olduğunu düşünür. Yaxın gələcəkdə biotexnologiyalar daha da inkişaf etdikcə şirkət o istiqamətə doğru fəaliyyətini indidən genişləndirmək üzərində çalışır. Samsung eyni zamanda bağlantı modemlərinin də təminatçısıdır və 6G texnologiyasının inkişaf mərhələsində olduğu bildirilir. Açılacaq yeni müəssisələrin çoxu şirkətin vətəni Cənubi Koreya üçün nəzərdə tutulub. Yatırımın 80%-lik hissəsi məhz ölkə daxilində qalacaq.
