Kamera sensorlarında təsvir ölçüsünü ifadə edən meqapiksel termininin nəyi ifadə etdiyini bilirsiniz? Bilmirsinizsə böyük bir ehtimalla smartfon kameraları barədə hazırladığımız və hər bir xırda detala toxunduğumuz “Smartfonlarda işlədilən kameraları daha yaxından tanıyaq!” məqaləsini hələ də oxumamısınız. Qısa formada təsvir ölçüsünün (meqapiksel) nə olduğunu ifadə etsək, kamera sensoru üzərindəki piksellərin sayı olduğunu qeyd edə bilərik. Məsələn, 48MP nəzərən danışırıqsa 48.000.000 ədəd pikselin bir sensor üzərində toplanmasından bəhs edilir. Həmin piksel 4-4 birləşib bir piksel kimi davransa görüntü 12MP olaraq qeydə alınır. Bəs bunun tərsini tətbiq etsək nə olar sualını verən LateNiteSoft firması iPhone-un 12MP kamerası ilə 48MP görüntü emal edən proqram təminatını təqdim edib.
iPhone modelləri 12MP kamera ilə necə 48MP görüntü qeydə alacaq?
Fiziki olaraq bir pikselin eyni anda 4 piksel kimi davranması mümkün olmadığından, aydın məsələdir 48MP görüntülər proqram təminatı vasitəsilə qeydə alınır. Belə ki, LateNiteSoft tərəfindən hazırlanmış Camera+ tətbiqi böyük bir yeniləmə alıb. Camera+ 22 kimi anons edilmiş tətbiq 10 milyondan çox şəklin analiz edilərək hazırlandığı xüsusi aloqritmlərə sahibdir. Ona görə iPhone 11 üzəri cihazlarda qeydə aldığınız 12MP görüntüləri keyfiyyətli şəkildə 48MP təsvir ölçüsünə qədər yüksəldə bilir. Tətbiq UltraRes xüsusiyyətinin də imkanlarından yararlanır. Tətbiqin işləməsi üçün minimum iOS 15.0, iPadOS 15.0 və watchOS 6.0 əməliyyat sistemlərinə sahib cihazlara sahib olmalısınız. Tətbiqi ayda 3.99 dollar, ildə 17.99 dollar və ya 24.99 dollar ödəyərək ömürlük əldə edə bilərsiniz.
Belə bir tətbiqin ortaya çıxması bir yandan da iddiaları gücləndirəcək şəkildə təəccübləndiricidir. İddialar nədir desəniz, iPhone 14 seriyasında 48MP kameraların təqdim edilməsi ehtimalından söhbət gedir. Sony tərəfindən hazırlanmış 1/1.3 düymlük 48MP təsvir ölçülü özəlləşdirilmiş sensorun iPhone 14 Pro seriyası smartfonlarda işlədilməsi planlaşdırılır. Sanki LateNiteSoft bir neçə ay əvvəldən iPhone 14 seriyasına hazırlıqlar görür.
iPhone 14 seriyasına toxumuşkən bir neçə gün əvvəl ortaya çıxmış yeni bir detalı da sizinlə bölüşək. İddialara görə iPhone 14 modelinin bir üst variantı iPhone 14 Max yox, iPhone 14+ adlandırılacaq. Yəni seriya daxilində iPhone 14 və iPhone 14+ modelləri bir sinfə, iPhone 14 Pro və iPhone 14 Pro Max modelləri fərqli sinfə aid olacaq. Birinci sinif cihazlar Apple A15 çipsetindən, ikinci sinif cihazlar Apple A16 çipsetindən güc alacaq.
