Xiaomi şirkətinə məxsus Redmi brendi hər il yaz aylarında yeni flaqman modellərini təqdim edir. Həmin flaqman modellər Çin bazarı üçün nəzərdə tutulur və Redmi K seriyasının nümayəndələri olurlar. Redmi K seriyası qlobal bazarda təmsil olunmadığından həmin cihazların başqa cür adlandırılmasına, daha doğrusu təkrar brendləşdirilməsinə ehtiyac yaranır. Redmi K30 seriyasından başlayaraq flaqman smartfonlar POCO F seriyası altında qlobal bazarda təmsil olunmağa başlayıb. POCO F2 Pro, POCO F3 seriya modelləri uyğun olaraq Redmi K seriyasından gələn təkrar brendləşdirilmiş smartfonlar olublar. İndi isə növbə POCO F4 modelindədir. Lakin xatırlatmaq istərdik ki, POCO F4 modeli seriyanın ilk modeli deyil. Bir neçə ay əvvəl çıxmış POCO F4 GT bu seriyanın ilk modeli olmuşdu.
POCO F4 modeli artıq onlayndır! Təqdimatı çox uzaqda deyil!
Bu gün günorta saatlarından etibarən, sanki POCO tərəfindən verilmiş icazə ilə birlikdə modelin görüntüləri ortaya çıxmağa başlayıb. Hindistanlı insayderlər başda olmaqla bəzi mənbələr modelin canlı görüntülərini sosial media hesablarından paylaşıblar. İndi sizə görüntülərini təqdim etdiyimiz şəkillər stufflistings ləqəbli insayder istinadən sizlərlə paylaşılır.
POCO F4 5G modeli əslində Redmi K40s modelinin modifikasiya dəyişikliyi edilmiş variantı hesab edilə bilər. Dizayn, gövdə elementləri, ümumilikdə cihazın quruluşu Redmi K40s ilə eyni olsa da kamera cəhətdən müəyyən üstünlüklərə sahibdir. Redmi K40s modelində 48MP kamera sensoru istifadə olunur. Lakin POCO F4 modelində 48MP yerinə 64MP kamera sensoru quraşdırılıb. Kamera parametrlərindən danışmışkən OIS dəstəyinin olduğunu da xüsusuilə vurğulamaq lazımdır. Digər kameralar isə 8MP ultra-geniş, 2MP makro sensorlarından ibarət olacaq.
Cihaz öz gücünü Snapdragon 870 çipsetindən alacaq. Yəni keçən il çıxarılmış POCO F3 ilə müqayisədə performans cəhətdən fərq mövcud deyil. 120Hz tezlikli FHD+ təsvir ölçülü Samsung E4 AMOLED ekran paneli ilə təchiz edilib. 4500mAh batareyası 67W sürətli şarj dəstəkləyəcək.
POCO F4 5G modelinin 19 iyun tarixində təqdim ediləcəyi iddia edilir. Yaxın vaxtlarda həmin gün brendin özü tərəfindən də dəqiqləşdiriləcək. Məyus edici bir şeyi də qeyd etmək istəyirik ki, POCO F4 Pro olaraq sertifikatlaşdırılmış və bir çox verilənlər bazasını ziyarət etmiş smartfonun çıxarılmasından imtina edilib. Həmin cihaz 2K AMOLED ekran və Dimensity 9000 çipseti ilə təchiz edilmiş Redmi K50 Pro modeli ilə birə-bir eyni olacaqdı.
