Bildiyimiz kimi, elektromobillərin avtomobil bazarında rolu gün keçdikcə daha da artır. Lakin bu artış gələcəkdə böyük problemlərə yol aça bilər. Elon Musk Bosch Connected World konfransında bildirib ki, 2025-ci ildə dünyada elektrik qıtlığı yaşanacaq. Belə ki, Elon süni intellektin və elektrik avtomobil sənayesinin eyni vaxtda inanılmaz səviyyədə artması nəticəsində elektrik enerjisi ilə bağlı problemlərin yaşanacağını bildirir. Qeyd edək ki, elektrik avtomobillərinin istehsal olunmasında ilkin səbəb dünyada karbon emissiyasının azalması idi. Daxili yanma mühərrikli avtomobillərə nəzərən elekrik avtomobillər ətraf mühit üçün çox daha zərərsizdir.
Tesla şirkətinin CEO-su və qurucusu Elon Musk uzaqdan qoşulduğu konfransda açıq şəkildə bildirib ki, 2025-ci ildə dünya elektrik qıtlığı yaşayacaq. Məşhur milyarder həmçinin, şirkətin sürücüsüz avtomobillər və insanabənzər robotlar hazırlamaq planları haqqında bəzi məlumatlar verib. Ümumi olaraq isə Elon texnologiyanın sürətli inkişafı ilə əlaqədar narahatlığını dilə gətirib. Konfrans zamanı Elon, “Mən əvvəllər heç bir texnologiyanın bu qədər sürətlə irəlilədiyini görməmişdim” dedi. Bundan əlavə, Elon Musk, süni intellekt hesablamalarının həcminin hər altı ayda 10 dəfə artdığını bildirdi. Onun sözlərinə görə, belə sürətli artımın qeyri-müəyyən müddətə davam etməsi mümkün deyil, ona görə də tədricən səngiyəcək.
Elon hesab edir ki, dünya yarımkeçirici böhranını artıq aradan qaldırdığından, növbəti darboğaz elektrik enerjisi istehsalı və enerji şəbəkələrinin istismarı olacaq. Muskın sözlərinə görə növbəti qıtlıq məhz elektrik enerjisi olacaq. Bütün çipləri eyni vaxtda işlədə bilmək üçün kifayət qədər enerji tapılmayacaq. Hətta gələn il bu problem özünü büruzə verməyə başlayacaq. Tesla CEO-su düşünür ki, elektrikli nəqliyyat vasitələri və süni intellekt kimi yüksək enerji tələbatı olan iki sektorun eyni vaxtda populyarlaşması elektrik avadanlıqları və enerji istehsalına böyük tələbat yaradır. Dünya isə bu tələbata hələ tam hazır deyil.
