Beləliklə ilin sonu yaxınlaşdıqca Samsung brendinin yeni Galaxy S24 seriyası üçün həsrət azalır. Yeni seriya ilə bağlı daha əvvəl bir çox detal ortaya çıxmışdı. O cümlədən yeni flaqman seriyanın 2 çipset ilə qlobal bazara çıxacağı da dəqiqləşmişdi. İndi isə çoxdandır gözlənilən Samsung Galaxy S24 seriyasının təqdimat tarixi ilə bağlı məlumat yayılıb. Məlumata görə, cənubi koreya mərkəzli texnologiya nəhəngi flaqman smartfon modellərini gələn ilin əvvəli, daha dəqiq desək 17 Yanvar tarixində bizlərə təqdim edəcək.
Qeyd edək ki, bu tarix hələ rəsmi olaraq açıqlanmasa da, bir çox analitiklər tarixi təsdiqləyib. Məhz buna görə deyə bilərik ki, Galaxy S24 seriyasının təqdimat tədbiri məhz gələn il 17 yanvar tarixində baş tutacaq. Xatırladaq ki, Galaxy S23 seriyası da məhz 17 fevral tarixində bizlərə təqdim edilmişdi. SBS Biz mənbəsinə görə Galaxy Unpacked 2024 tədbiri məhz yanvar ayının 17-də baş tutacaq. Daha əvvəl isə məşhur analitik Ice Universe təqdimatın 18 yanvarda baş tutacağı barədə məlumat vermişdi. Əslində ABŞ və Çin arasındakı vaxt fərqlərini nəzərə alsaq iki tarix də təqdimat tədbiri ilə üst-üstə düşə bilər.
Ümumiyyətlə bildiyimiz kimi, Samsung Galaxy S24 smartfonu qlobal bazarda iki fərqli çipset ilə təqdim ediləcək. Bunlar isə müvafiq olaraq Exynos 2400 və Snapdragon 8 Gen 3 çipsetləridir. Seriyaya Galaxy S24 Ultra, S24 Plus və S24 modelləri aid ediləcək. Həmçinin, Galaxy S24 modelinin 6.2 düymlük FHD+ təsvir ölçülü ekran paneli 120 Hz ekran tezliyinə sahib olacaq. Həmçinin Galaxy S24 Plus modelinin 6.7 düymlük WQHD+ təsvir ölçülü ekran paneli 120 hz ekran tezliyinə sahib olacaq. Galaxy S24 Ultra modeli isə 6.8 düymlük WQHD+ təsvir ölçülü ekran panelinə sahib olacaq.
