Google tədqiqatçıları ANC qulaqlıqları ilə ürək döyüntüsünü ölçə bilir!

Google tədqiqatçıları bu dəfə texnologiya dünyasında bir ilkə imza ataraq, ANC qulaqlıqları ilə ürək döyüntüsünü ölçə bilməyin yolunu tapıb. Belə ki, hazırda bir çox texnoloji cihaz istifadəçilərin ürək döyüntüsünü ölçə və təhlil edə bilir. Lakin Google bir ilkə imza ataraq qulaqlıqlardan ürək döyüntüsü ölçməyin bir yolunu tapıb. Rəsmi bir yazıya görə Google mütəxəssisləri artıq ANC, yəni ətraf mühitin səs-küyünü azalda bilən qulaqlıqlar ilə istifadəçilərin nəbzini ölçə bilir.

Ümumiyyətlə bu gün ürək döyüntüsünü ölçə bilən bir çox texnoloji və tibbi cihaz var. Həmçinin bu cihazların hamısı ortaq olaraq Fotopletismoqrafiya və ya PPG adlı sistemdən istifadə edir. İşıq əsaslı bu sistem qan aktivliyinə nəzər yetirir və ürək döyüntüsünü təhlil edir. Lakin Google tədqiqatçıları tərəfindən yeni hazırlanmış sistem isə satışda mövcud ANC qulaqlıqları ilə Audioplethysmography (APG) texnikasından istifadə edərək ürək döyüntüsünü aşkar edir. Bu sistem isə birbaşa ultrasəs vasitəsilə istifadəçinin nəbzini yəni, ürək döyüntüsünü ölçür. Ultrasəs siqnalları ilk öncə qulaq kanallarına göndərilir, ANC qulaqlıqlarındakı mikrofonlar isə qan dövr etdikdə dəri səthinə qayıdan siqnallardan ürək döyüntüsünü ölçür.

Onu da qeyd edək ki, proqram təminatını yeniləyərək bu ürək döyüntüsünün ölçülməsi infrastrukturunu qulaqlıqlara gətirə bilən Google tədqiqatçıları sistemi ümumi istifadəyə təqdim etməyə hələ hazır deyillər. Xatırladaq ki, Google ötən ay da “The Check Up” adlı sağlamlıq xidmətləri tədbiri təşkil edərək, burada ultrasəs nəticələrinin qiymətləndirilməsi, tibbi dil modelləri və xərçəng müalicələri ilə bağlı yeni süni intellekt texnologiyaları haqqında mühüm məlumatları paylaşmışdı. Görünən odur ki, Google sağlamlıq sahəsində böyük səylər göstərir.