Apple şirkəti hər il tərtibatçılar üçün nəzərdə tutulmuş WWDC (Worldwide Developers Conference) konfransını keçirir. Konfransda önümüzə çıxan Apple məhsulları özünü daha çox yenilənmiş əməliyyat sistemləri cəhətdən göstərir. Lakin eyni zamanda Apple tərəfindən hazırlanmış digər məhsulları da görə bilirik. Ötən il keçirildiyi kimi bu il də onlayn formada baş tutacaq WWDC 2022 konfransı bu gündən başlayır. 6-10 iyun tarixləri arasında davam edəcək konfransın ilk gününü Bakı vaxtilə saat 21:00-da Apple rəsmi YouTube kanalı üzərindən izləyəcə biləcəksiniz. Eyni zamanda tədbirin maraqlı hissələrindən sosial media hesablarımız üzərindən biz də sizlərə məlumat verəcəyik. Yeniliklər barədə xəbərdar olmaq üçün bizi bütün sosial şəbəkələrdə @tedroidcom yazaraq tapa bilərsiniz.
WWDC 2022 konfransında bizi nələr gözləyir?
Apple şirkətinin yenilikləri ilə bağlı qabaqcadan xəbər verməsi ilə bilinən Bloomberg resursunun yazarı Mark Gurman, əməliyyat sistemlərinə gələcək yeniləmələr barədə fikirlərini bölüşüb. Qeyd edilir ki, WWDC 2022 konfransında iOS 16, iPadOS 16, WatchOS 9, tvOS təqdim ediləcək. iOS 16 və iPadOS 16 əməliyyat sistemlərində vidjetlərin yaxşılaşdırılması gözlənilsə də, dizayn cəhətdən əhəmiyyətli bir dəyişiklik olmayacaq. Lakin bildiriş ekranı, sağlamlıqla bağlı olan tətbiqlər, mesajlaşma tətbiqi və kilid ekranında ciddi təkmilləşdirmə işləri görüləcək. WatchOS 9 günlük istifadəni və naviqasiyanı təkmilləşdirən yeniləmələr alacaq.
Ötən həftə iPhone 14 seriyasının həmişə açıq ekran (AOD) ilə təchiz ediləcəyini bildirmişdik. Böyük bir ehtimalla iOS 16 bu xüsusiyyəti dəstəkləyəcək, amma iPhone 14 seriyasında istifadəyə veriləcək. Bu vaxta qədər çıxmış smartfonlarda bu xüsusiyyəti bəziləri gözləsə də belə bir dəstək verilməsi ehtimalı azdır. Bəlkə yalnız iPhone 13 Pro və iPhone 13 Pro Max modelləri bu xüsusiyyəti ala bilər. Çünki, ekran panellərinin yeniləmə tezliyi adaptiv tənzimlənərək 10Hz-ə qədər düşməyi bacarır.
WWDC 2022 konfransında görmə ehtimalımızın olduğu növbəti möhtəşəm yenilik isə MacBook Air ola bilər. MacBook Air 2022 modelinin öz gücünü M2 prosessoru ilə təchiz ediləcəyi düşünülür. M1 seriyası prosessorların göstərdiyi möhtəşəm nəticələrdən sonra M2 prosessorunu təsəvvür etmək insanı heyrətə gətirir. Digər bir tərəfdən Apple şirkətinin hazırladığı virtual reallıq eynəyi də diqqət mərkəzindədir. Apple bu eynək üçün RealityOS əməliyyat sistemini inkişaf etdirirdi. Bütün bunları nəzərə alsaq qarşıdakı 5 gün əsl texnologiya həvəskarlarının günü olacaq.
