Yəqin ki, ölkəmizdə baş tutmuş Teknofest 2022 Aviasiya, Kosmik və texnologiya festivalında dronların nə qədər çox olduğunu gedənlər xatırlayır. Gələcəyin vacib avadanlıqlarından olan dronlar bu gün hərbi sahədən tutmuş əyləncə sektoruna qədər çeşidli yerlərdə istifadə olunur. Hətta dron texnologiyaları o həddə çatıb ki, bu gün insanların işlərini belə əlindən ala və ya oturaq formaya sala bilər. Bunun səbəbi isə yeni nəsil dronların süni intellektlə işləməsi və ya virtual reallıq eynəkləri vasitəsilə uzaqdan idarə olunmasıdır. Belə ki, Pitch Aero firması sahib olduğu əhəmiyyətli xüsusiyyəti ilə fərqlənən maraqlı bir dron hazırlayıb. Astria adı verilən dron havada sabit qala bilmə bacarığına sahibdir. Üstəlik sabit qalmaqla qalmayıb ona quraşdıracağınız alətlərlə çətin yerlərdə təmir, analiz işləri apara bilər.
Pitch Aero firmasının Astrio dronu hansı bacarıqlara sahibdir?
Şirkətin Astrio olaraq adlandırdığı dronun ilk diqqət çəkən tərəfi onun ölçüsüdür. 3 metr uzunluğunda olan dron siklorotor prinsipinə əsaslanan pərlərlə sabit qala bilir. Siklorotor texnologiyasının nə olduğundan qısaca bəhs etsək, pərlərin bir nöqtə ətrafında üfüqi deyil şaquli formada fırlandığını düşünə bilərsiniz. Həmin siklorotor drona havada sabit qalmaq üçün müəyyən bir qüvvə yaradarkən, digər oxlara quraşdırılmış 6 ədəd kiçik sadə pər uçuşu təmin edir. Dronun bu cür pər sisteminə sahib olması ona yuxarı, aşağı, sağ-sol və irəli-geri istiqamətlərdə rahat və xırda yerdəyişmə imkanı verir.
Digər dronlardan fərqli olaraq Astria, ani əsən küləyə də davamlılıq göstərə bilir. Havada sabit qalıb bir iş görərkən külək siklorotor hesabına dronu yerindən tərpədə bilmir. Dronun 3 metr olduğunu demişdik. Ən arxa ucunda batareya paketi quraşdırılıb. Baş ucunda isə lazımi alətlərinizi, təmir avadanlıqlarınızı quraşdıra biləcəyiniz hissə yer alıb. Dron 4,5 kiloqrama qədər yükləri qaldıra bilir. Hətta rəqəmin artacağı gözlənilir.
Dron isə virtual reallıq eynəyi və özünün idarə etmə pultu ilə idarə olunur. Daşınması da rahat olsun deyə firma dronu hissələrə bölünərək xüsusi çantaya yerləşə biləcək şəkildə istehsal edib. Astira, gələcək üçün həqiqətən ümid vəd edir. Lakin hələ biraz da təkmilləşdirilməsinə ehtiyac var.
