Böyük bir ehtimalla növbəti həftə Xiaomi şirkətinə məxsus POCO brendi F5 seriyasını rəsmi olaraq başladacaq. Təqdim ediləcək modellər, əslində bir-birindən fərqli və özünəməxsus cihazlardırlar. Digər bir tərəfdən isə şirkətin elə öz istehsalı Redmi Note 12 seriyasına birbaşa mənfi təsir göstərəcək səviyyədədirlər. Artıq son 2 ildir ki, POCO brendi F seriyasının Pro modeli ilə debüt etmirdisə bu boşluğa da son qoyur. Şirkət Çində təqdim etdiyi Redmi K60 və Redmi Note 12 Turbo modellərini qlobal bazara gətirəcək. Cihazlar əslində, Çindəki qarşılıqları ilə birə-bir eyni olsa da cüzi dəyişikliklər edilməsi gözlənilir. Məsələn, Çində Redmi K60 modeli 5500 mAs batareyaya sahibdirsə, POCO F5 Pro modelində 5000 mAs həcmli ənənəvi batareyalara keçid edilməsi gözlənilir.
Cihazların dizaynı əvvəlcədən bizə məlum olduğu kimidir. Heç bir əlavə dəyişiklik yoxdur. Böyük POCO yazıları əlavə edilməyib. POCO F5 Pro modelində, sanki cihaza telefoto obyektivi quraşdırılıb hissiyatı versin deyə makro kamerası düzbucaqlı şəklində dizayn edilib. Lakin belə bir şey olmadığı üçün smartfona ilkin baxış zamanı möhtəşəm kamera parametrləri gözləməyə dəyməz.
Lakin performans cəhətdən cihaz həqiqətən çox güclüdür. Öz gücünü Snapdragon 8+ Gen 1 çipsetindən alır. 5000mm² həcmli buxar qazanlı (VC) soyutma sistemi yerləşdirilib. UFS 3.1 yaddaş həlli və LPDDR5 texnologiyaları vardır. Redmi K60 modelinin OV64B 64MP əsas kamerası OIS dəstəyinə sahibdir. Digər 2 əlavə kamera isə standart olaraq 8MP 118° ultra-geniş, 2MP makro sensorlarıdır. 4K keyfiyyətdə 60FPS videolar qeydə almaq mümkündür.
POCO F5 sadə modeli isə favoritdir. Çünki, bu cihaz Redmi Note 12 Turbo modelidir. POCO F5 modeli incə çərçivəli smartfonlar trendinin ilk nümunələrindən biri hesab edə bilər. Tam olaraq 1.95 mm qalınlıqda kənar, 1.42 mm qalınlıqda üst və 2.22 mm qalınlıqda çənə çərçivələri ilə 93.4% ekranın gövdə nisbəti verməkdədir. 6.67 düymlük 120Hz FHD+ OLED ekrana malikdir. POCO F5 əsas kamerası 64MP OV64B sensoru ilə gücləndirilib. Uyğun olaraq 8MP IMX355 ultra-geniş bucaqlı və 2MP makro, 16MP selfi kameraları mövcuddur.
Smartfon olduqca güclü Snapdragon 7+ Gen 2 ilə təchiz edilmişdir. UFS 3.0 və LPDDR5 yaddaş texnologiyaları ilə gücləndirilən POCO F5 bu çipsetdan bir çox flaqmana yaxın performans göstərməsi ilə fərqlənir. 5000 mAs batareyası POCO F5 Pro modeli kimi 67 vatt sürətli şarj dəstəkləyir.
İddialara görə cihazlar 27 aprelə qədər rəsmi olaraq anons edilmiş olacaq. May ayında isə smartfonların satışa gəlməsi gözlənilir. Qiymət rəqabətcil olarsa, xüsusilə POCO F5 modeli yüksək satış ədədləri ilə fərqlənən model olacaq.
