Ötən gün Çində Redmi brendi özünün yeni flaqman Redmi K60 seriyası cihazlarını təqdim edib. Redmi K60E, Redmi K60 və Redmi K60 Pro olmaqla 3 fərqli smartfon qarşımıza çıxarılıb. Smartfonların hər birinə olduqca yüksək performanslı çipsetlər quraşdırılıb. Diqqət çəkən bir nüans var ki, cihazlarda istifadə edilmiş çipsetlərin hər biri TSMC əsaslı istehsal prosesinə malikdir. Yəni söhbət Dimensity 8200, Snapdragon 8+ Gen 1 və Snapdragon 8 Gen 2 çipsetlərindən gedir.
Smartfonlarla yaxından tanış olmamışdan əvvəl gəlin ilk olaraq qlobal bazara bu cihazların necə çıxarılacağına nəzər salaq. İndiyə qədər məlum olan detallara əsasən, POCO F5 və POCO F5 Pro modelləri hazırlıq mərhələsindədir. Redmi K60 Pro modeli verilənlər bazasında POCO F5 Pro olaraq öz qarşılığını tapır. Sadə POCO F5 modeli isə qeydlərə görə Redmi K60 olmalıdır. Lakin ötən il Xiaomi şirkəti son anda qərarından daşınaraq Redmi K50 yox, Redmi K40S modelini yəni, Redmi K60E modelinin sələfini POCO F4 kimi adlandıraraq qlobal bazara çıxardı. POCO F4 Pro modeli isə ləğv edildi. Sektorla daha iç-içə olan insanlar POCO F4 Pro modelinin limitli sayda test üçün istehsal edilmiş variantını bəlkə də görüblər. Heç vaxt satışa verilməyən POCO F4 Pro seriyanın bu vaxta qədər olan ən güclü cihazı Dimensity 9000 çipsetinə və 2K AMOLED ekrana malik idi. Ümid edirik, POCO F5 Pro modelinin də taleyi POCO F4 Pro kimi olmaz.
Redmi K60 seriyası bizə nə vəd edir?
Yenilənmiş Redmi K60 seriyası əslində hər il gətirilən standart təkmilləşdirmələrə sahibdir. Dizayn cəhətdən möhtəşəm bir yenilik yoxdur. Sadəcə bir detal diqqət çəkir ki, sanki cihaza telefoto obyektivi quraşdırılıb hissiyatı versin deyə makro kamerası düzbucaqlı şəklində dizayn edilib. Lakin belə bir şey olmadığı üçün smartfona ilkin baxış zamanı möhtəşəm kamera parametrləri gözləməyin.
Ekran parametrləri
Beləliklə, Redmi K60 və Redmi K60 Pro modellərinə TCL istehsalı 2K təsvir ölçülü 6.67 düymlük 120Hz tezlikli OLED ekran paneli quraşdırılıb. 480Hz sensor tezlikli 12 bit rəng dərinlikli ekran paneli “DolbyVision” standartına malikdir. Göz qoruması üçün 1920Hz tezlikli PWM texnologiyasını dəstəkləyirlər.
Redmi K60E modelinə isə bu vaxta qədər Redmi K40 (POCO F3), Redmi K40S (POCO F4) modellərində işlədilən Samsung istehsalı 120Hz tezlikli E4 AMOLED ekran paneli quraşdırılıb. Seriya daxilində bu cihaz, eyni ekran panelinin işlədildiyi üçüncü nəsil cihaz olsa da təsvir ölçüsü FHD+ yox, 2K olaraq qeyd olunub. Yəni müəyyən bir yaxşılaşdırma ən azından mövcuddur.
Performans parametrləri
Redmi K60 Pro modeli öz gücünü Snapdragon 8 Gen 2 çipsetindən alarkən, Redmi K60 modelinə Snapdragon 8+ Gen 1, Redmi K60E modelinə isə Dimensity 8200 çipseti quraşdırılıb. Fərqliliklər özünü təkcə çipset tərəfindən göstərməyib. Redmi K60 Pro modelinə UFS 4.0 və LPDDR5X yaddaş texnologiyaları quraşdırılarkən, digər iki modeldə UFS 3.1 yaddaş həlli və LPDDR5 texnologiyaları vardır. Redmi K60E modeli istisna olmaqla, digə 2 cihaza 5000mm² həcmli buxar qazanlı (VC) soyutma sistemi yerləşdirilib.
Qeyd edək ki, Redmi K60 Pro modelində UFS 4.0 yaddaş həlli yalnız 256GB və üzəri variantlarda mövcuddur. 128GB yaddaş variantını alsanız UFS 3.1 ilə qarşılaşacaqsınız.
Kamera parametrləri
Yeni Redmi K60 seriyası daxilində hər üç modeldə fərqli əsas kameralar mövcuddur. Lakin hər üç cihazın kamerası OIS dəstəyinə sahibdir. Redmi K60 Pro modelinə IMX800 50MP, Redmi K60 modelinə OV64B 64MP, Redmi K60E modelinə isə IMX582 48MP əsas kameralar quraşdırılıb. Digər 2 əlavə kamera isə hər üç cihaz üçün eynidir. Həmin kameralar isə standart olaraq 8MP 118° ultra-geniş, 2MP makro sensorlarıdır. Keyfiyyət baxımından çox güclü olmasalar da Redmi K60 Pro və Redmi K60 modelləri ilə 4K keyfiyyətdə 60FPS videolar qeydə almaq mümkündür. Redmi K60 Pro modeli 8K keyfiyyətdə 24FPS-ə qədər imkan tanıya bilir.
Batareya və qiymət barədə detallar
Aralarında ən güclü olan Redmi K60 Pro modelinə 5000 mAs həcmli 120 Vatt kabelli, 30 Vatt kabelsiz şarj dəstəkləyən batareya quraşdırılıb. Redmi K60 və Redmi K60E modelləri isə 5500 mAs həcmli 67 vatt kabelli şarj dəstəkləyən batareya ilə təchiz ediliblər. 3.5mm qulaqlıq girişi ləğv edilsə də həqiqi stereo səs ucaldanlara hər 3 cihazda yer verilib.
8-128GB başlanğıc variantının qiyməti Redmi K60E üçün 315$, Redmi K60 üçün 360$, Redmi K60 Pro üçün 475$ təşkil edir.
Redmi Band 2, Redmi Watch 3 və Redmi Buds 4 Lite aksesuarları da tanıdılıb!
Aksesuarlar barədə danışmağa Redmi Buds 4 Lite ilə başlayaq. 12mm səs drayverinə sahib bu qulaqlığın hər bir tayı sadəcə 3,9 qram ağırlıqdadır. IP54 sertifiatı ilə su sıçramalarından da qorunan qulaqlıqlar qabla birlikdə 20 saat istifadə müddəti verir. Qulaqlıq bunu, 320 mAs həcmli batareyasına borcludur. Bluetooth 5.3 ilə bağlantı gecikməsi xeyli azdır. Münasib qiymətli naqilsiz qulaqlıqlar sinfinə aid olduğu üçün aktiv səs-küy azaltma (ANC) dəstəyi yoxdur.
Qiyməti, 21 dollar təşkil edir.
Redmi Watch 3 ağıllı saatı 1.75 düym ölçülü AMOLED ekrana sahibdir. 60Hz tezlikli ekranı ilə çox səlis istifadəçi təcrübəsi yaşadacaq ağıllı saat, həmişə açıq ekran “Always On Display” dəstəkləyir. 600 nit parlaqlıqlı ekranı gün işığında istifadə üçün uyğundur. Normal istifadə zamanı Xiaomi şirkəti bu ağıllı saat üçün 12 gün işləmə müddəti vəd edir. 5ATM suya qarşı davamlı olan Redmi Watch 3 modeli 121 fərqli idman rejimi, smartfona bağlı olmadan aktiv GPS dəstəyi və bir çox sağlamlıq xüsusiyyətlərinə malikdir.
Qiyməti, 72 dollar təşkil edir.
Redmi Band 2 modeli isə 1,47 düymlük LCD ekranla təchiz edilib. 9,99 mm qalınlığa və sadəcə 14,9 qram ağırlığa malikdir. Ucuz qiymətli sadə bir ağıllı saat modeli olan Redmi Band 2, Bluetooth ilə zəngləri idarə etməyi belə dəstəkləmir. Yalnız gündəlik idman, sağlamlıq izləməsi kimi tələblər üçün uyğundur.
Qiyməti, 24 dollar təşkil edir.
