Redmi brendi bu vaxta qədər Note seriyası altında çıxartdığı bütün cihazları unudun. İndi isə, yalnız Redmi Note 8 Pro modelini xatırlamağınızı istərdik. Həmin cihaz Redmi Note tarixində ilk böyük sıçrayışın təməlini formalaşdırmışdı. Bunu isə sahib olduğu Helio G90T çipsetinin Redmi Note 7 seriyasından sonra gətirdiyi ciddi performans artımına borclu idi. Həmin çipset xüsusilə MediaTek üçün də bazara qayıdışın təməlini formalaşdıran güclü oyun optimizasiyaları və oyunlarda orta-seqmentdə tək yüksək FPS verən çipset olmaqla (xüsusilə PUBG mobile oyunçuları üçün 60FPS) çox yaxşı populyarlıq qazandı. Redmi Note 12 Turbo isə o vaxtkı sıçrayışdan sonra performans tərəfində Redmi Note seriyası üçün tarixi sıçrayışı formalaşdırır.
Redmi Note 12 Turbo modeli nə vəd edir?
Bunun səbəbi Redmi Note 12 Turbo modelinin Qualcomm tərəfindən çıxarılmış 2023-cü ilə damğasını vuran Snapdragon 7+ Gen 2 ilə gəlməsidir. Bu çipsetin detalları barədə sizlərə çıxdığı zaman informasiya vermişdik. Həmin çipset adı ilə nə qədər Snapdragon 7 Gen seriyasına aid olsa da artıq çoxlarınızın bildiyi kimi performansı ilə Snapdragon 8 Gen 1 çipsetini belə qabaqlaya bilən, performans davamlılığı ilə Snapdragon 8+ Gen 1 ilə rəqabət aparmaqdadır. Çipsetin Azərbaycan dilində detallı analizini oxumaq üçün yazdığımız digər bir bloq yazısına elə bura toxunmaqla keçid edə bilərsiniz.
Ona görə də şəkillərdən də gördüyünüz kimi tam olaraq 1.010.385 xallıq AnTuTu performansı ilə flaqman səviyyəsində nəticə göstərən bir cihaza baxırıq. Smartfonun tək üstün cəhəti bundan ibarət deyil. Belə ki, Redmi Note 12 Turbo modeli incə çərçivəli smartfonlar trendinin ilk nümunələrindən biri hesab edə bilər. Tam olaraq 1.95mm qalınlıqda kənar, 1.42mm qalınlıqda üst və 2.22mm qalınlıqda çənə çərçivələri ilə 93.4% ekranın gövdə nisbəti verməkdədir. Bu da iPhone 14 Plus ilə müqayisədə çərçivələrin 1mm-ə qədər incə olması deməkdir.
Smartfonun ekranı olduqca keyfiyyətlidir. 6.67 düymlük 120Hz FHD+ OLED ekran 1920Hz PWM göz qoruması standartına malikdir. 12 bitlik bir panel işlədildiyi üçün 68,7 milyard rəng yarada bilmə potensialındadır. DC Dimming, Dolby Vision, P3 rəng qamutu standartı, SGS sertifikatı və.s kimi üstünlüklər əldə edib.
Redmi Note 12 Turbo əsas kamerası 64MP OV64B sensoru ilə gücləndirilib. Uyğun olaraq 8MP IMX355 ultra-geniş bucaqlı və 2MP makro, 16MP selfi kameraları mövcuddur. Əsas kamera OIS ilə gücləndirilib. In-Sensor Zoom adı verilən texnologiya isə əsas kamera ilə itkisiz 2 qat yaxınlaşdırma imkanı gətirib. Eyni zamanda Xiaomi Imaging Brain 2.0 texnologiyası ilə gücləndirilib. İndidən deyək ki, bu cihaz nə adla qlobal bazara gəlir gəlsin, kamera performansı böyük bir ehtimalla Çindəki qədər yaxşı olmayacaq. Çünki, proqram təminatı cəhətdən Çin variantındakı zənginlik kamera performansına əhəmiyyətli təsir edir.
Bu cihaz eyni zamanda satışdakı ən ucuz 1TB yaddaş təklif edən cihaz kimi qarşımıza çıxır. UFS 3.0 və LPDDR5 yaddaş texnologiyaları ilə gücləndirilən Redmi Note 12 Turbo modeli 5000 mAs batareya ilə gəlir. Bir sirr verək ki, cihazı açıb baxan Çinlilər cihazın LPDDR5X operativ yaddaş ilə təchiz edildiyini təsdiqləyiblər və cihaz 8533MHz tezlikli flaqman modellər üçün nəzərdə tutulan operativ yaddaşa malikdir. Lakin Snapdragon 7+ Gen 2 çipseti LPDDR5 operativ yaddaş dəstəyinə malik kimi göstərildiyindən ehtimallara görə leqallaşdırılması üçün şirkət də texniki xüsusiyyətləri LPDDR5 olaraq qeyd edib. Fiziki və yazılan xüsusiyyətlər cəhətdən uyğunsuzluq var. Smartfon 67 vatt sürətli şarj dəstəkləyir.
Redmi Note 12 Turbo modelinin qiyməti
Smartfonun ən ucuz 1TB yaddaşlı model olduğunu qeyd etmişdik. Belə ki, cihazın 16GB-1TB yaddaşa malik variantı 378 dollar təşkil edərkən, heç də az olmayan 8-256GB başlanğıc variantı 290 dollar təşkil edir. Yaxın aylarda bu cihazın POCO F5 5G olaraq qlobal bazarda əlçatan olması gözlənilir.
