OnePlus brendi tam olaraq Oppo şirkətinə inteqrasiya edildikdən sonra, həm güclü olduğu Amerika bazarında, həm də qlobal bazarda öz reytinqini sürətlə itirməyə başladı. Əvvəllər yalnız flaqman smartfonları ilə tanınan brend, mərhələli şəkildə büdcəvi səviyyələrə endi, hətta klaviatura və monitor istehsalıçısı belə oldu. Nəticədə bu gün OnePlus flaqman smartfonlarının elə də diqqət mərkəzində olmadığını görə bilərsiniz. OnePlus 9 seriyası az-çox sevilsə də, OnePlus 10 modeli istifadəçilər tərəfindən heç də rəğbətlə qarşılanmadı. İndi isə Oppo şirkəti OnePlus brendi gücləndirmək üçün böyük bir investisiya ayıraraq strateji əməkdaşlıq elan edir.
OnePlus şirkəti yenidən flaqman smartfon brendi imicinə geri qaytarıla bilər
Bir neçə gün əvvəl əməkdaşlıqla bağlı keçirilən illik tədbirdə, Oppo tərəfindən başladılan 3 illik strateji əməkdaşlığı barədə məlumat verib. Belə ki, strateji əməkdaşlığa görə qarşıdakı 3 il ərzində Oppo şirkəti “ikili brend” adlandırdığı strategiyası ilə OnePlus üçün 1,43 milyard yatırım edəcək. Bu strategiya timsalında flaqman smartfonlar arasında OnePlus brendi lider markalardan birinə çevrilməlidir.
Oppo şirkəti OnePlus məhsullarının xalis mənfəət marjasını sıfırlayacaq. Yəni xalis mənfəətin gəlirə nisbətini ifadə edən və ya vahid gəlirə düşən xalis mənfəət sıfırlanmış olacaq. Digər bir tərəfdən Çində OnePlus məhsulları yalnız onlayn olaraq satılacaq. Fiziki satış məntəqələri ləğv ediləcək. Ən maraqlısı isə OnePlus brendinin fokuslanacağı flaqman smartfonlar daha rəqabətcil qiymətə malik olacaq. Bütün Oppo servis mərkəzləri isə OnePlus məhsullarının təmiri üçün hazır vəziyyətə gətiriləcək.
Qeyd edək ki, qarşıdan gələn OnePlus 11 modelində bu əməkdaşlığın təsirlərini görüb-görməyəcəyimiz naməlumdur. Lakin OnePlus 11 modelinin 7 fevral tarixində təqdim ediləcəyi rəsmi olaraq təsdiqlənib.
