OnePlus brendi, Google-un Pixel smartfonlarında təklif etdiyi 3 illik Android yeniləməsini geridə qoyub. Belə ki, Çinli smartfon istehsalçısı 2023-cü ildən istehsal edəcəyi bəzi flaqman modellərini 4 illik Android yeniləməsi ilə təklif edəcəyini bildirib. Bundan əlavə brend, Oxygen OS 13.1 interfeysinin 2023-cü ilin birinci yarısında qlobal miqyasda istifadəyə veriləcəyini də bildirib. Qeyd edək ki, OnePlus brendi artıq 1 ilə yaxındır Oppo şirkətinin daxilindəki brend kimi fəaliyyət göstərir.
OnePlus, 4 illik Android yeniləməsi təklifi ilə Google şirkətini geridə qoyur
Ötən gün OnePlus şirkəti Londonda keçirilən tədbirdə yeni dəyişikliyini elan edib. Brendin yeniliyi smartfon həvəskarları tərəfindən maraqla qarşılanıb. Qeyd etdiyimiz kimi həmin tədbirin əsas məqsədi Oxygen OS 13.1 interfeysinin 2023-cü ilin birinci yarısında qlobal miqyasda elan edilməsi və Android 13 barədə olub. Belə ki, brendin yeni əməliyyat sistemi, Google tərəfindən hazırlanmış Spatial Audio və iki yeni həmişə açıq ekran seçimi kimi funksiyalar ilə təkmilləşdirilib. Həmçinin OxygenOS 13.1 əməliyyat sistemi, yeni “aquamorphic” dizayna sahib. Bütün bu yeniliklərdən əlavə olaraq isə brend, UI dəyişikliklərinə əvvəlcədən xəbər verən veb saytı da elan edib.
Əlavə olaraq qeyd edək ki, 2023-cü ildə istehsal edəcəyi smartfonlara 4 illik Android yeniləməsi təklif edən brend, bu il təqdim olunmuş bəzi cihazlarına 3 illik android yeniləməsi də gətirmişdi. OnePlus 10 və OnePlus 10T Pro cihazları da daxil olmaqla bütün flaqman smartfonları 3 illik android dəstəyinə malikdir. Qeyd edək ki, Google şirkəti Pixel smartfonlarına 3 illik android yeniləməsi təklif etsə də, əlavə olaraq 5 ilə qədər təhlükəsizlik yeniləməsi də təklif etmişdi. Belə ki, məşhur smartfon istehsalçısı olan Samsung isə yeni smartfonlarına 4 illik android yeniləməsi və 5 illik təhlükəsizlik yeniləməsi təklif edirdi. Bunu görən OnePlus brendi Google və Samsung ilə rəqabət apara bilmək üçün yeni smartfonlarının android yeniləməsinə 1 il də əlavə etmək qərarına gəlib.
