Hər il yeni seriyası təqdim olunan iPhone modellərinin demək olar eyni dizayna sahib olması bir çox istifadəçi tərəfindən tənqid olunurdu. Belə ki, yeni iPhone modelləri texniki olaraq yenilənsə də, dizayn olaraq sadəcə kamera quruluşuna görə fərqlənirdi. Apple şirkətini, oxşar dizayna malik iPhone təqdim etdiyi üçün tənqid edən lipilipsi ləqəbli Twitter istifadəçisi qıvrımlı ekrana malik iPhone 14 Pro Max modeli hazırlayıb.
İlk baxışda olduqca premium görünən xüsusi iPhone modeli, insanlar arasında müzakirələrə səbəb olub. Belə ki, bəzi insanlar bloqerin hazırladığı qıvrımlı ekrana malik iPhone 14 Pro Max modelini bəyənsə də, digərləri xüsusi hazırlanmış modeli eybəcər adlandıraraq bəyənməyib. Qeyd edək ki, qıvrımlı ekran panelinə malik xüsusi modeli hazırlamaq üçün smartfonun paslanmayan poladdan olan çərçivəsini biraz incəltməli olub. Xüsusi hazırlanmış iPhone modelinin arxa hissəsinin və yan hissəsinin dizaynı isə olduğu kimi qalıb.
Əlavə olaraq qeyd edək ki, daha əvvəllər lipilipsi ləqəbli istifadəçi Apple Watch ağıllı saatından istifadə edərək, iPhone smartfonunun arxa hissəsinə displey əlavə etmişdi. Bundan başqa isə bloqer USB-C konnektrou ilə təchiz olunmuş ilk iPhone modelini də hazırlamışdı. Lipilipsi bildirir ki, müəyyən ödəniş qarşılığında istəyənlər üçün smartfonu bu formaya gətirə bilər. Üstəlik cihazın işləməsində də hansısa problem yaşanmır. AMOLED ekran olduqca elastik olduğundan rahatlıqla bu formaya gətirilə bilir.
Samsung brendi ilk dəfə 2014-cü ildə Galaxy Note Edge ilə birlikdə qıvrımlı ekrana malik smartfonların əsasını qoymuşdu. Məhz bu modeldən sonra Apple istifadəçiləri də qıvrımlı ekrana malik iPhone təqdim ediləcəyini gözləsə də Apple brendi ənənəvi dizayna malik düz ekran panellərindən əl çəkmirdi. Gələn il təqdim olunması gözlənilən iPhone 15 seriyasının USB-C konnektrou ilə təchiz olunacağı məlum olsa da onun ekranı barədə hələlik məlumat yoxdur.
