Elektromobil sahəsində daim yenilikləri ilə məşhurlaşan Tesla şirkəti indi də 1 meqavatt ultra sürətli enerji doldurma texnologiyasını elan edib. Ötən gün yeni Tesla Semi elektrikli yük maşınını sınaqdan keçirmişdi. Teslanın elan etdiyi yeni texnologiya, məhz Tesla Semi və CyberTruck modelləri üçün nəzərdə tutulub. Qeyd edək ki, şirkət Cybertruck adlanan elektrikli pikapını 2023-cü ilin ortalarında satışa çıxarmağı planlaşdırır. Teslanın elektrikli yükmaşını olan Semi isə artıq bu gündən bir neçə şirkət tərəfindən kütləvi istifadə olunur. Ultra sürətli enerji doldurma texnologiyasının gələcəkdə şirkətin digər modelləri üçün əlçatan olacağı bildirilir. Müqayisə üçün qeyd edək ki, Tesla Model S modeli DC doldurma məntəqələrində maksimum 250 kVt ilə şarj ola bilir. 1 meqavatt isə növbəti ildən çıxarılacaq elektromobillərin bəlkə də 5-8 dəqiqəyə tam doldurulmasına imkan yaradacaq.
Tesla bildirib ki, 1 meqavatt ultra sürətli enerji doldura bilən dördüncü nəsil Supercharger doldurma stansiyalarını 2023-cü ildə quraşdırmağa başlayacaq. Tesla-nın CEO-su Elon Musk-ın sözlərinə görə, V4 Supercharger 1000 kVt enerji doldurma qabiliyyətinə, həmçinin maye soyutma sisteminə malik yeni doldurma kabeli ilə işləyəcək. Maraqlısı odur ki, Musk bu ilin yazında Tesla elektrik avtomobili şəbəkəsinin daha yüksək gərginlikli enerji stansiyalarına keçid imkanını müzakirə etmişdi, lakin o, enerji stansiyasının doldurma göstəricisinin 400 kVt-dan 800 kVt-a qədər arta biləcəyini qeyd etmişdi. Ötən gün Elon Musk-ın 1000 kVt enerji doldurma qabiliyyətinə sahib yeni texnologiyanı elan etməsi hərkəs tərəfindən təəccüb ilə qarşılanıb.
Əlavə olaraq qeyd edək ki, Tesla-nın yeni elektrikli yük maşını olan Tesla Semi ötən gün Nevadadakı Gigafactory-də keçirilən tədbirdə təhvil olunmağa başlanıb. Belə ki, Tesla Semi-nin ilk tədarükçüsü şirkətin söz verdiyi kimi Pepsi şirkəti olub. Pepsi şirkəti artıq yeni elektrikli yük maşınından istifadə etməyə başlayıb.
