Həmyerlimiz Emin Əliyev bəlkə də bəzilərinizə tanışdır. Çünki, Emin Əliyev birdən çox startapı və layihələrdə iştirakı ilə səs gətirmiş şəxslərdən biridir. Xüsusilə təsisçisi olduğu Murmur startapı, Click2Call, Voice.AI, Azerics IT Consulting, Easymove (uber for pikap-Failed), Chicago Tech, Startco Memphis kimi layihələrin inkişafı ilə yadda qalmışdır. Belə ki, Emin Əliyevin qurduğu mühim startaplardan biri olan Easymove startapı ötən gün “exit” edib. Startap ekosistemi ilə əlaqədar olmayanlar üçün qeyd edək ki, ən sadə formada “exit” etmək bir startapın böyüyərək satılmasını xarakterizə etməkdədir. Easymove layihəsi də tam olaraq 7 rəqəmli qiymətə “exit” etmiş startap kimi qeydə alınıb.
2018-ci ildə qurulan startapın əsas məqsədi hər hansı bir mənzil, ev köçürülməsi və mebel, cihazın çatdırılma ehtiyacları üçün həll yolu təklif etməkdir. Bir növ elektron daşıma platforması kimi fəaliyyətinə davam edən Easymove platforması ötən gün Amerikanın elektron ticarətlə məşğul olan Acquirer platforması tərəfindən alınıb.
Emin Əliyevin bizə verdiyi məlumata görə Easymove platformasının “exit” etməsindən əldə edilən məbləğ həmyerlimizin digər bir startapının inkişafına yönəldiləcək. Söhbət isə Murmur startapında gedir. Murmur startapını isə çoxlarınız yəqin ki, görmüsünüz. Murmur startapının əsas məqsədi isə bel çantalarının üzərinə yerləşdirilən ekranlarla reklamı mobilləşdirməkdir. Startap bel çantasından yararlanaraq bir xərc olmadan mağazada, avtobusda, küçədə, universitetdə, bir şəxsin ola biləcəyi hər yerdə reklam verməyi təmin edir. Emin Əliyev tərəfindən San-Fransisko və Çikaqoda yaradılan startap hal-hazırda innovativ reklam platforması kimi ölkəmizdə də fəaliyyət göstərir.
