UNEC Startup inkubator tələbələr və digər şəxslərin startup ideyalarını gerçəkləşdirməyə dəstək vermək məqsədilə “BootSTART” proqramına start verib. BootSTART proqramı – 6 həftəlik intensiv startup yetişdirmə proqramıdır. Proqramda İsrail modelindən istifadə olunacaq və startup üzrə yüksək təcrübələrə malik olan İsrail və Azərbaycanın bir çox mentor və mühazirəçiləri iştirakçılara öz dəstəyini göstərəcək. İdeyaları konseptin təsdiqi və MVP mərhələsinə çatdırılmasına dəstək olan “BootSTART” proqramı 16 dekabr tarixinədək davam edəcək.
Proqram bitdikdən sonra seçilən top 5 komanda ilə birlikdə inkubatorun digər mərhələlərinə keçid olunacaqdır. Top 5 komandaya ilkin investisiya, hostinq, ofis rezidentliyi və digər rəqəmsal dəstəklər veriləcəkdir. Proqrama ümumilikdə 67 fərdi və 20 komanda müraciəti edilmişdir. Fərdi müraciətlərdən 24 nəfər seçilmiş və onlardan 7 komanda formalaşdırılmışdır. Komanda müraciətlərindən isə ümumilikdə 8 komanda proqrama seçilmişdir.
Beləliklə, 15 komanda ilə birlikdə 24 oktyabr tarixində proqrama start verilmişdir. Komandalarla ilkin görüş zamanı tanışlıq prosesi olduqdan sonra proqramın ümumi gedişatı, gözləntilər, hədəflər və komandaların əsas öhdəlikləri müzakirə olunub. UNEC Startup inkubator və BootSTART proqramı ilə bağlı ətraflı məlumat üçün aşağıdakı düymə ilə əlaqədar veb sayta keçid edə bilərsiniz.
