Ötən gün baş tutan təqdimatın sonuncu diqqət çəkən məhsulu isə Xiaomi Mini-Host kompakt kompüteri oldu. Belə ki, Xiaomi 13 seriyası, o cümlədən Xiaomi Buds 4 və Xiaomi Watch S2 modellərinin təqdimat icmallarının ardıyca gəlin indi də Mini-Host barədə danışaq. Apple Mac Mini modelinin sanki, “Windows” əməliyyat sistemi üçün kopyası olan Mini-Host dizayn cəhətdən rəqibinə çox bənzəyir. Təbii ki, bu cihazı Apple Mac Mini rəqibi adlandırmaq performans cəhətdən çox da doğru olmaz. Çünki, Mac Mini kompüteri Apple M seriyası prosessoru ilə, Xiaomi Mini-Host modelinin Core i5-1240P prosessorundan daha effektiv performansa malikdir. Lakin yenə də ortalama işləri görməyə yarayan 437 qramlıq bu kompüter olduqca maraqlı görünür.
Yeni Xiaomi Mini-Host kompüteri nə vəd edir?
Kompüterin gövdəsi tamamilə alüminium əsaslı materialdan hazırlanıb. Nəticədə Xiaomi Mini-Host modeli çox yaxşı termal keçiriciliyə, yüngül çəkiyə və dayanıqlılığa malikdir. Daxilindəki 12-ci nəsil Core i5 (1240P) 12 nüvəli prosessoru ilə yüngül qrafik işləri və bütün ofis işlərini görməyi mümkün edən bu kompüter 512GB PCle 4 SSD və 16GB DDR4 RAM ilə təchiz edilib. Hətta istəyə görə RAM həcmini 64GB etmək, SSD həcmini isə 4TB-a qədər artırmaq mümkündür.
Kompüterin xarici qrafik kartı olmadığı üçün daxili Intel Irıs Xe qrafik kartı görəcəyiniz işlərə güc verir. Qeyd edək ki, prosessor maksimum 4.4GHz tezlikdə işləyə bilir və operativ yaddaşın da tezliyi 3200MHz-dir. Üstəlik kiçik gövdəsi daxilində 4600RPM sürətində fırlanan pərli (fanlı) soyutma sistemi və tam olaraq 44753mm² həcmli mis buxar qazanı quraşdırılıb. Ona görə də performansını uzun müddət stabil qorumağı bacarır.
Xiaomi Mini-Host modeli USB 3.2, USB 2.0, 2 ədəd Thunderbolt 4 və HDMI girişinə sahibdir. Bunun da səbəbi 4 ədədə qədər 4K keyfiyyətli 60Hz tezlikdə işləyən monitora eyni anda görüntü verməyi bacarmasıdır. Digər bir tərəfdən 2.5G dəstəkli LAN girişi, WiFi 6 dəstəyi, Bluetooth 5.3 kimi texnologiyaları da özündə birləşdirir. Həmçinin, 3.5mm qulaqlıq girişi quraşdırmağı da Xiaomi şirkəti unutmayıb.
Qutudan Windows 11 ilə çıxan cihazın 16GB RAM və 512GB SSD ilə təchiz edilmiş variantı 3699 Yuan (530$) təşkil edir. Lakin Xiaomi şirkəti bu kompüterin heç bir RAM və SSD quraşdırılmayan variantını da təqdim edir. Yəni müştəri Xiaomi Mini-Host modelini ucuz qiymətə alıb istədiyi həcmdə RAM və SSD quraşdıra bilər. Bu zaman isə qiymət 400 dollara qədər enir.
