Məşhur mesajlaşma tətbiqi olan WhatsApp hər gün fərqli bir yeniliyi ilə qarşımıza çıxmağa davam edir. Belə ki, rəqib tətbiqlərdəki xüsusiyyətləri bir-bir özünə inteqrasiya etməsi ilə gündəmdə olan WhatsApp platforması son dəfə mesajların tarix üzrə axtarışı ilə qarşımıza çıxmışdı. İndi isə WhatsApp tətbiqi birdəfəlik mesajlar yeniliyini istifadəyə verməyə hazırlaşır. Texniki cəhətdən bu yenilik şəkillərin birdəfəlik göndərilməsi ilə oxşar prinsip daşıyacaq.
WABetainfo resursunun verdiyi məlumata görə WhatsApp birdəfəlik mesajlar xüsusiyyəti gizliliyin artırılması üçün yararlı olacaq. Lakin qeyd etmək lazımdır ki, yeni xüsusiyyət təkcə adi mesajlaşmalarda yox, qrup mesajlaşmalırında da işləyə biləcək. Birdəfəlik mesajı oxuyan şəxslər eyni zamanda mesajı başqasına yönləndirə, kopyalaya və ekran görüntüsü ala bilməzlər.
Yenilik 2.22.25.20 Android Beta variantında ortaya çıxıb və yaxın vaxtlarda yekun versiyada yayımlanması gözlənilir. Bütün bunlara baxmayaraq birdəfəlik mesajların neçə saniyə ekranda qalacağı və ya tam olaraq necə görünəcəyi məlum deyil. Aşağıdakı ekran görüntüsünə baxdıqda “göndər” simgəsinin üzərində “kilid” işarəsi görülür. Böyük bir ehtimalla mesajı görmək üçün üzərinə basdıqda, həmin mesaj ümumi mesajlardan ayrılıb daha böyük ekranda açılan şəkil kimi görünəcək.
Yenə də WhatsApp birdəfəlik mesajlar yeniliyi barədə rəsmi açıqlama vermədiyi üçün xüsusiyyətin istifadəyə verilib-verilməyəcəyi məchuldur. Xüsusilə bu yenilik şifrə, kart məlumatları kimi detalları paylaşmağı asanlaşdırmalıdır. Əlavə olaraq qeyd edək ki, WhatsApp tətbiqi özünüzə məxsus avatarların da yaradılmasını istifadəyə verir. Avatar yeniliyi iPhone modellərindəki Memoji ilə oxşar olacaq.
