Bildiyimiz kimi, Xiaomi tərəfindən ötən günlərdə yeni HyperOs interfeysi elan edilmişdi. İndi isə Xiaomi şirkətinin yeni HyperOS interfeysinin ilk görüntüləri internetə sızdırılıb. Sızdırılan görüntülərə ilk dəfə nəzər saldıqda onun Android əsaslı olduğunu görmək mümkündür. Lakin yenə də bu interfeys özü ilə birlikdə bir çox yeniliklər də təklif edəcək. Həmçinin yeni interfeys MIUI ilə müqayisədə daha fərqli dizayna sahibdir. Lakin yenə də bənzərlik müşahidə edə bilərsiniz. Çüki tətbiq nişanları və idarəetmə mərkəzi demək olar ki, eynidir.
Ümumiyyətlə smartfon bazarının ən böyük istehsalçılarından biri olan Xiaomi proqram təminatı departamentində yeni səhifə açmağı planlaşdırır. Məhz bu plana uyğun olaraqda şirkət MIUI interfeysini əvəzləyəcək yeni HyperOS adlı interfeysini elan etmişdi. HyperOS bütün diqqətləri öz üzərinə cəlb etdikdən sonra isə onun ilk görüntüləri ortaya çıxdı. 2017-ci ildən bəri hazırlanan bu interfeys anons edilərkən Xiaomi CEO-su Lei Jun bunu tarixi an olaraq adlandırmışdı.
Sızdırılan şəkillərə baxsaq, deyə bilərik ki, HyperOS MIUI interfeysinə çox bənzəyir. Hətta bu interfeysdə oxşar tətbiq nişanları və idarəetmə mərkəzi istifadə olunur. Lakin Xiaomi yeni şablon növləri, saat, widget seçimləri və daha ətraflı divar kağızı seçimləri ilə daha çox fərdiləşdirmə variantları təklif etməyi planlaşdırır. Hazırda MIUI istifadə edən və Android 14 yeniləməsini aldığı məlum olan cihazların HyperOS-u alıb-almayacağı hələlik məlum deyil. Çox güman ki, yeni interfeys ilə bağlı detallar Xiaomi 14 seiryası ilə birlikdə təqdim ediləcək.
