Süni intellekt bu dəfə çip sahəsində inqilab edir. Belə ki, Synopsys-in süni intellekt texnologiyası ilə hazırlanmış 300 dən çox kommersiya çipi istehsal olunur. Beləliklə, son dövrlərdə gündəmdə olan süni intellekt indi də öz çiplərini dizayn etməyə başlayıb.
Süni intellekt çiplərinin dizaynı sahəsində sakit bir inqilab baş verir. Synopsys-in AI texnologiyası ilə hazırlanmış 300-dən çox kommersiya çipi hazırda istehsal prosesindədir. Bu inkişaf mikroprosessor sənayesinin gələcəyi ilə bağlı mühüm yeniliklərdən xəbər verir. Ümumiyyətlə, son iki onillikdə prosessor texnologiyasının inkişafı inanılmaz səviyyələrə çatıb. Belə ki, 2001-ci ildə Nintendo GameCube-un Gekko prosessorunda 21 milyon tranzistor olduğu halda, bu gün 50 milyard tranzistor dırnaq ölçüsündə bir çipə yerləşdirilə bilir. Bu irəliləyiş dizayn prosesini getdikcə mürəkkəbləşdirir və süni intellekt dəstəyini demək olar ki, məcburi edir.
Müasir çip dizaynı, Elektron Dizayn Avtomatlaşdırma (EDA) alətləri sayəsində mümkün olub. Synopsys və Cadence Design Systems kimi şirkətlər tərəfindən hazırlanmış süni intellektlə dəstəklənən EDA sistemləri çip arxitekturasının müəyyənləşdirilməsi, yoxlama və istehsalın planlaşdırılması kimi kritik mərhələlərdə dizaynerlərə dəstək verir. Google DeepMind-in AlphaChip layihəsi çip dizaynında süni intellektin potensialını göstərən parlaq nümunələrdən biridir. Bu sistem insan dizaynerlərin həftələr boyunca davam edən işlərini bir neçə saat ərzində tamamlaya bilir. Xüsusilə Google-un Tensor Processing Units (TPU) kimi qabaqcıl çiplərin dizaynında istifadə edilən AlphaChip, inanılmaz performans göstərir. Synopsys şirkətinin süni intellekt və ML üzrə vitse-prezidenti Tomas Andersenin sözlərinə görə, süni intellektlə işləyən dizayn alətləri mühəndislərin məhsuldarlığını 30%-dən 50%-ə qədər artırır.
