Facebook, Instagram və WhatsApp-ın ana şirkəti hesab olunan Meta indi öz sualtı fiber optik kabel infrastrukturunu qurur. 10 milyard dolları keçməsi planlaşdırılan layihədə kabellərin uzunluğu 40 min kilometri keçəcək.
Qeyd edək ki, Facebook, Instagram və WhatsApp-ın ana şirkəti olan Meta qlobal miqyasda ən böyük internet trafikinə malik ikinci şirkətdir. Bütün sabit trafikin 10%-ni, mobil trafikin isə 22%-ni təşkil edən şirkət, süni intellektə etdiyi investisiyalarla internet trafikini daha da artırmağı düşünür. Bu səbəbdən etibarlı infrastruktura sahib olmaq istəyən şirkət özünün fiber optik kabel infrastrukturunu çəkməyi planlaşdırır.
TechCrunch tərəfindən şirkətə yaxın mənbələrdən verilən məlumata görə, layihəyə 10 milyard dollardan çox investisiya və 40 min km-dən çox fiber optik şəbəkə daxildir. Bildirilir ki, Meta bu sualtı fiber kabel şəbəkəsinin yeganə sahibi və istifadəçisi olacaq. Sualtı kabel mütəxəssisi və Flag Telecom adlı şirkətin qurucusu Sunil Tagare bildirir ki, plan 2 milyard dollarlıq büdcə ilə başlamaqdır, lakin layihə irəlilədikcə bu rəqəm 10 milyard dolları keçə bilər. Meta-nın 2025-ci ilin əvvəlində bu məsələ ilə bağlı ictimaiyyətə açıqlama verəcəyi gözlənilir, o zaman planlaşdırılmış marşrut, tutum və kabelin tikintisinin bəzi əsaslandırmaları daxil olmaqla, kabel planlarını təsdiqləyəcək. Mənbələr bildirirlər ki, kabelin planlaşdırılmış marşrutu hazırda ABŞ-ın şərq sahillərindən Cənubi Afrikadan keçərək Hindistana, sonra isə Hindistandan Avstraliya vasitəsilə ABŞ-ın qərb sahillərinə qədər uzanır.
