Nvidia şirkəti ötən gün baş tutan Computex 2023 tədbirində bir çox yeniliklərini təqdim edib. Belə ki, texnologiya nəhəngi ilk olaraq oyunlardakı süni intellektli xarakterlər ilə bağlı yeniliyini açıqlayıb. Həmçinin oyunlar üçün yeni Avatar bulud mühərrriki və ya ACE təqdim edilib. Taipedə keçirilən sərgi də şirkətin CEO-su olan Jensen Juan çıxış edib. O bildirib ki, Nvidia oyun və süni intellekti kəsişdirəcək. Hətta bununla bağlı tədbirdə video da yayımlanıb.
Ümumiyyətlə Nvidia şirkəti Computex 2023 tədbirində süni intellekt sahəsinin daha da irəliləyəcəyindən danışıb. Bunun bariz nümunəsi məhz ACE mühərrikidir. Artıq oyunlarda xarakterlər təbii dialoqa girə biləcək. Süni intellektə sahib olan xarakterlər oyunçular ilə söhbət edə biləcəklər. Qeyd edək ki, Nvidia Omniverse texnologiyasına əsaslanan Ace mühərriki LLM dil modellərini söhbət və animasiyalarda yerləşdirmək üçün NeMo və Riva kimi süni intellekt alətlərindən istifadə edir.
Bununla da, artıq oyun xarakterləri gamerlara hekayəyə uyğun tamamilə fərqli cavablar verə bilər, onlarla ünsiyyət qura bilər. Bütün bunlar yeni süni intellekt əsaslı Ace mühərriki tərəfindən həyata keçiriləcək.Qeyd edək ki, yeni Ace alətlərinin bir hissəso olan Omniverse Audio2Face yeni S. T. A. L. K. E. R. 2 oyununda istifadə ediləcək. Omniverse Audio2Face 3D xarakterli üz animasiyalarını oyun xarakterlərində birləşdirir.
Nvidia Computex 2023 tədbirində hansı yeniliklər oldu?
Ötən gün baş tutan tədbirdə ən əsas yenilik Nvidia şirkətinin Ace bulud mühərriki olsa da, tədbirdə əlavə olaraq bir neçə yeniliklərdən də xəbər verilib. Belə ki, texnologiya nəhəngi yeni süni intellekt kompüteri olan DGX GH200 modelini təqdim edib. Qeyd edək ki, yeni kompüter yüksək performanslı süni intellekt və böyük məlumatların işlənilməsi üçün nəzərdə tutulub. 256 Grace Hopper superçipi və 144 TB yaddaşa sahib olan bu cihaz superkompüter də adlandırılır. Həmçinin hərbir Grace Hopper superçipi Nvidia Grace prosessoru və H100 sürətləndiricisinə malikdir. Bundan əlavə yeni texnologiya sürətli və enerjiyə qənaət edən NVlink-C2C interconnect ilə təchiz edilib. Bununla da, prosessorun sürəti 7 dəfə artaraq 900 Gb/s sürətinə çatır. Həmçinin enerji istehlakının təxminən 5 dəfə azaldığını demək mümkündür.
Nvidia Computex 2023 tədbirində elan edilən yeni xəbərlərdən biri də məhz Nvidia şirkətinin Grace Hopper superçiplərini kütləvi olaraq istehsal etməsidir. Beləliklə texnologiya nəhəngi ötən aylarda təqdim tdiyi yeni GH200 Grace Hopper superçiplərini kütləvi istehsal etməklə daha çox DGX GH200 kompüterlərinə sahib olacaq. Qeyd edək ki, Grace Hopper çiplərinə əsaslanan platformalar da bu ilin sonunda satışa çıxarılacaq. Bununla da Nvidia süni intellekt sahəsində daha da təkmilləşəcək və liderliyini qoruyub saxlayacaq.
