Proqram təminatı nəhəngi Microsoft, qarşıdan gələn yeni dövrdə bütün süni intellekt sistemlərini “Windows Intelligence” adı altında toplaya bilər. Belə ki, texnologiya nəhəngi bütün süni intellekt sistemlərini bir yerə toplamaqla istifadaçilərini rahat istifadə imkanı da təqdim edəcək.
Bildiyimiz kimi, Apple öz məhsuldar süni intellektə əsaslanan sistemlərini “Apple Intelligence” altında toplayır. Microsoft tezliklə bu ada oxşar addan istifadə etməyə başlaya bilər. Sızdırılan məlumatlara görə, Microsoft-un məhsuldar süni intellektə əsaslanan sistemləri “Copilot” əvəzinə “Windows Intelligence” adı altında bazara çıxarılmağa başlaya bilər. Habelə, ötən həftələrdə məlum olmuşdu ki, Copilot Pro xüsusiyyətləri Microsoft 365-in Şəxsi və Ailə abunəliklərinin bir hissəsinə çevrilir. Generativ süni intellektə əsaslanan Copilot Pro xüsusiyyətləri Avstraliya, Yeni Zelandiya, Malayziya, Sinqapur, Tayvan və Taylandda yerləşən Microsoft 365-in Şəxsi və Ailə abunəliklərinə daxildir. Hazırda digər ölkələrdəki istifadəçilər Copilot Pro ilə təklif olunan funksiyalardan istifadə etmək üçün ayda əlavə 20 dollar ödəməlidirlər.
Tezliklə bütün ölkələr üçün bunu tamamilə aradan qaldırması gözlənilən Microsoft bu mövzuda istifadəçilərinin rəğbətini qazanır. Atılan addımla bağlı açıqlama verən şirkət bildirib ki, “İstehlakçılarımızı Copilot Pro vasitəsilə Microsoft 365 tətbiqlərimizdə Copilot ilə tanış etməyimizdən 9 ay keçib. Biz bu vaxtı sistemə yeni funksiyalar əlavə etmək, performansı artırmaq və müştəri rəylərini diqqətlə dinləməklə keçirdik”. Bundan əvvəl isə Mac və PC üçün Microsoft Office 2024 elan edilmişdi. Bu versiya Microsoft 365 abunəliyindən istifadə etmək istəməyən insanlar üçün nəzərdə tutulub. Həm son istifadəçilər, həm də kiçik şirkətlər üçün təklif olunan Microsoft Office 2024 əsasən Word, Excel, PowerPoint və OneNote-a ev sahibliyi edir.
