Texnologiya sahəsində daim gündəm olan Elon Musk bu dəfə nə Tesla, nə SpaceX nə də ki, X sosial şəbəkəsi ilə gündəmə gəlməyib. Belə ki, Elon Musk bu dəfə investorlara xAI-nin Grok süni intellekt çatbotunun yeni versiyasını gücləndirəcək superkompüter layihəsi olduğunu açıqlayıb.
Elon Musk-ın bir çox şirkətlərindən sadəcə biri olan xAI-nin pullu süni intellekt çatbotu Grok superkompüterlə təkmilləşəcək. Görünən odur ki, Elon Musk süni intellekt tərəfində OpenAI və Google kimi texnologiya nəhənglərinin yeniliklərindən sonra öz süni intellekt çatbotunu təkmilləşdirməyi düşünür. Lakin Elon Musk bunu qeyri-adi formada superkompüter ilə həyata keçirməyi planlayır. The Information-ın hesabatına görə, xAI superkompüterin hazırlanması üçün Oracle ilə birlikdə çalışacaq və o, 2025-ci ildə istifadəyə veriləcək.
Musk bu ilin əvvəlində Grok 2-nin öyrədilməsi üçün 20.000 Nvidia H100 GPU-ya ehtiyac duyduğunu və gələcək Grok modellərinin 100.000-dən çox H100 GPU tələb edəcəyini bildirmişdi. Adını Tesla Giga fabriklərindən alan və “kompüterlərin gigafabriki” adlandırılan bu superkompüteri yaratmaqla xAI daha təkmil dil modelləri hazırlaya bilər. Bilməyənlər üçün qeyd edək ki, Grok AI X.com-da istifadə edilə bilər, lakin bunun üçün müəyyən aylıq abunə haqqı ödənilməlidir. Grokun digər modellərə nisbətən ən böyük üstünlüklərindən biri X-dəki bütün yazılara birbaşa çıxışının olmasıdır.
