İsveçrənin hava keyfiyyəti üzrə ixtisaslaşmış “IQAir” şirkətinin hesabatına görə ötən gün və bu gün Bakı şəhərində havanın keyfiyyəti olduqca aşağıdır. Belə ki, IQAir mənbəsinə görə hazırda Bakı şəhərində havanın çirklilik əmsalı 175 AQI US-dır. Hansı ki, ötən günlərdə bu göstərici sadəcə 70-80 olurdu. Ümumiyyətlə, IQAir hazırda paytaxtımızdakı havanın keyfiyyətinin qeyri-sağlam olduğunu bildirir.
Hətta, İsveçrəli şirkət öz hesabatında Bakı sakinlərini çölə çıxmamaları, eləcə də maskadan istifadə etməkləri, pəncərələri mümkün qədər açmamaları barədə xəbərdar edir. Qeyd edək ki, ölkəmizin digər regionlarında və şəhərlərində hazırda hava keyfiyyət göstəricisi normaldır. Bakı şəhəri və Bakı ətrafı ərazilərdə isə vəziyyət heç də ürəkaçan deyil. Bəs havanın bu qədər çirkli olma səbəbləri nələrdir?
IQAir bildirir ki, ümumi hava çirklənməsinin 51 faizi avtomobillərin emissiyaları səbəbindən yaranır. Təbii ki, qaz və neft məhsulları ilə işləyən avtomobillər, avtobuslar və digər texniki və nəqliyyat vasitələri atmosferə müəyyən miqdarda zəhərli qazlar buraxırlar. Mənbə bildirir ki, hazırda Bakı şəhərində 549 511 avtomobil qeydiyyatdadır. Bundan əlavə Azərbaycana gətirilən avtomobillərin əksəriyyəti “Avro-2” spesifikasiyasıdır. Havanın keyfiyyətini yaxşılaşdırmaq üçün bunu “Avro-3”, “Avro-4” və nəhayət, “Avro-5” səviyyəsinə qaldırmaq lazımdır. Habelə, şəhərdə mövcud olan fabrik və zavodlar da havanın çirklənməsinin əsas səbəblərindən biridir.
Ümumdünya Səhiyyə Təşkilatının məlumatına görə, havanın çirklənməsi müxtəlif beyin xəstəliklərindən ölümlərin 24 faizini və ürək-damar xəstəliklərindən ölümlərin 25 faizini təşkil edir. ÜST bildirir ki, havanın çirklənməsi bütün dünyada bir milyarddan çox insanın həyatını təhdid edir. Böyük şəhərlərdə yaşayan əhalinin 80 faizinin çirkli havadan zəhərləndiyini vurğulayan qurum havada kimyəvi maddələrin və müxtəlif zəhərli maddələrin çoxluğuna diqqət çəkir.
