Çin mərkəzli süni intellekt startapı DeepSeek bazara təqdim etdiyi ucuz qiymətli süni intellekt modeli ilə qlobal texnologiya ehtiyatlarında böyük bir çaxnaşmaya səbəb olub. Belə ki, Nasdaq fyuçersləri və Yaponiyanın texnoloji səhmləri bazar ertəsi günü kəskin ucuzlaşaraq, investorların süni intellektin gəlirliliyinə və yüksək səviyyəli çiplərə güclü tələbata olan inamını kökündən sarsıdıb. Beləliklə, yeni DeepSeek səbəbindən Nvidia 500 milyard dollar olmaqla, ABŞ səhm bazarı ümumilikdə 1 trilyon dollar itirib.
Qeyd edək ki, Nasdaq 100 fyuçersləri 2,6 faiz, S&P 500 fyuçersləri isə 1,4 faiz ucuzlaşıb. Nvidia səhmləri isə artıq 1 gecədə 25% dəyərsizləşərək ümumilikdə 500 milyard dollarlıq zərər əldə edib. Avropada isə Tesla, Amazon və Meta kimi nəhəng şirkətlərin səhmləri 2 faizdən çox ucuzlaşıb. Maraqlısı budur ki, bütün bunlar baş verərkən, DeepSeek ChatGPT kimi variantları geridə qoyaraq proqram mağazalarında birinci yerə yüksəlib. Digər tərəfdən, DeeepSeek-in arxasındakı kiçik Hangzhou startapı haqqında az şey məlumdur. DeepSeek tədqiqatçıları keçən ay dərc etdikləri məqalədə 10 yanvarda satışa çıxarılan DeepSeek-V3 modelinin təlimi üçün Nvidia-nın H800 çiplərindən istifadə etdiklərini və cəmi 6 milyon dollar xərclədiklərini yazmışdılar.
H800 çipləri əvvəlcə ABŞ-ın Çinə çip satışı məhdudiyyətlərini yumşaltmaq üçün istehsal edilib, lakin sonradan tamamilə qadağan edilib. Ümumiyyətlə, xərci müqayisə edə bilmək üçün qeyd edək ki, Meta və OpenAI-nin yeni modellərinin hazırlanması 100 milyon dollardan çox vəsait tələb edir. Süni intellektə investisiyaları ilə də diqqət çəkən SoftBank Group, 30 Sentyabrdan bu yana ən böyük gündəlik enişini yaşayaraq 8 faizdən çox itirib.
Nvidia kimi süni intellekt sənayesinin ulduzu olan şirkətlər 2024-cü ilin əvvəlindən bu yana 196 faiz dəyər qazanıb. Lakin DeepSeek-in ucuz modeli sənayedəki güc balansının yenidən formalaşa biləcəyini göstərir. Ümumiyyətlə, bununla deyə bilərik ki, süni intellekt təkcə bahalı infrastrukturlarla deyil, həm də innovativ və xərc yönümlü həllərlə inkişaf edə bilər.
