Son zamanlarda haqqında çox danışdığımız ChatGPT gündəmdə qalmağa davam edir. Google kimi nəhəngləri belə qorxuya salan bu süni intellekt indi isə təhsil mərkəzləri tərəfindən reaksiyalar almağa başladı. Xatırladaq ki, Microsost tərəfindən Bing daxilinə inteqrasiya ediləcək ChatGPT hələ də prototip mərhələsindədir və təbii dildə anlayıb cavab verə bilən söhbət botudur.
Bu süni intellekt problemləri həll edə, kod yaza, suallarınıza cavab verə, hətta məqalələr və tapşırıqlar yaza bilir. Təbii ki, süni intellektin tələbələrin ev tapşırıqlarını yerinə yetirə bilməsi də müəyyən narahatlıqlar yaratdı. İş o yerə çatdı ki, bir neçə həftə əvvəl ABŞ-dan olan professor tələbəsinin ev tapşırığı üçün ChatGPT-dən istifadə etdiyini öyrəndi. Bu tərz hadisələrin artacağı gözlənildiyi üçün OpenAI yazılan məqalələrin süni intellektə aid olduğunu anlamaq və arzuolunmaz halların qarşısını almaq üçün bunun üzərində işləməyə başladı.
ABŞ-ın Nyu-York şəhərindəki dövlət məktəblərinə cavabdeh olan Nyu York Şəhər Təhsil Departamenti ChatGPT-yə öz şəbəkələrindən və cihazlarından girişi blokladığını açıqlayıb. Buna səbəb kimi süni intellektin uşaqların təhsilinə zərər verə biləcəyi ehtimalı göstərilib. Qurumun sözçüsü Jenna Lyle açıqlamasında bildirib ki, bu qadağa məzmunun təhlükəsizliyi və dəqiqliyi ilə bağlı narahatlıqlar, eləcə də tələbələrin öyrənməsinə potensial mənfi təsirlərlə əlaqədardır. Bundan başqa “Bu alət suallara tez və asan cavab verə bilsə də, akademik və ömürlük uğur üçün lazım olan tənqidi düşüncə və problem həll etmə bacarıqlarını inkişaf etdirmir” deyə Jenna Lyle bildirib.
Qərar bizə bir daha pedaqoqların süni intellektlə bağlı nə qədər narahat olduğunu göstərir. Bir çox ekspertlər haqlı olaraq vurğuladılar ki, ChatGPT kimi proqramlar evdə tələbələrin esse yazma bacarıqlarını sınamağı qeyri-mümkün edir. Narahatlıqların olduqca normal olduğunu deyə bilərik. Çünki, ChatGPT işinizi sizin üçün saniyələr ərzində həll edə bilir. Bu da şagirdlərin ev tapşırıqlarını yerinə yetirməkdə çətinlik çəkməməsinə və bu sistemə müraciət etməsinə səbəb ola bilər.
