Rusiyaya qarşı olan sanksiyalar texnologiya sahəsində də davam edir. Belə ki, bəzi mənbələrə görə Rusiya Maliyyə Nazirliyi yerli əməliyyat sistemi ilə bağlı yeni qərar verəcək. Daha dəqiq desək Rusiyaya idxal edilən bütün kompüterlərə yerli əməliyyat sisteminin quraşdırılması məcburi olacaq. Bu barədə məhşur “Kommersant” iqtisadi qəzeti məlumat verib. Məlumata görə Rusiya Maliyyə Nazirliyi ölkəyə idxal edilən bütün fərdi kompüter və noutbuklarda yerli əməliyyat sistemi quraşdırılmasını məcburi etmək ilə bağlı qaydalar hazırlayır. Müvafiq qərarın bu yaxınlarda ictimaiyyətə açıqlanacağı gözlənilir.
Əslində Rusiya 2018-ci ildən bəri yerli əməliyyat sisteminə keçid etmişdi. Belə ki, bu zaman keçirilən anket nəticəsinə uyğun olaraq ən məşhur yerli əməliyyat sistemləri də məlum olmuşdu. Bunlar Astra Linux, Alt, Red OS əməliyyat sistmeləridir. Qeyd edək ki, Rusiya çoxdandır yerli əməliyyat sistemi olan RedOS kimi sistemlərə keçid etsə də, qanunsuz yollarla istifadəçilər Windows əməliyyat sistemindən istifadə edə bilirdi. Buna əsas səbəb isə ölkəyə gətirilən kompüterlərin əməliyyat sistemi olmadan sifariş verilməsidir. Hökumət isə bu qərar ilə belə halların qarşısını almağı planlayır.
Yeni qərar ilə isə əvvəllər istehsalçının öhdəliyində olan əməliyyat sistemi qərarı, hökumətin öhdəliyinə keçir. Yəni artıq istəkdən asılı olmayaraq idxal olunan bütün kompüterlər yerli əməliyyat sistemləri ilə təchiz ediləcək. Bunun Rusiyadakı texnologiya bazarına mənfi təsir göstərəcəyi güman olunur. Belə ki, yerli bazarlarda kompüterlərin qiyməti ikiqat bahalaşa bilər. Qərarın bu rübdə verilməsi planlaşdırılır.
