İngiltərənin Bath Universitetinin tədqiqatçıları rəqəmsal obyektlərlə sanki realmış kimi əlaqə saxlamağa imkan verəcək yumşaq sensorlu ekran prototipi hazırlayıblar. Məsələn, yastığı almadan əvvəl onun sərtliyini öyrənmək və ya ekrandakı faylları əzərək silmək mümkün ola bilər.
DeformIO adlanan prototip Apple-ın Force Touch-ı xatırladan texnologiyaya malik rezistiv müqavimətli növüdür. 25×25 sm ölçüsündə olan ekran silikon komponentlər və pnevmatik sistemdən istifadə edərək təzyiqə cavab verə və sərtliyini dəyişə bilər. Tərtibatçıların fikrinə görə, belə panel eyni anda bir neçə toxunuşu tanıya bilər. Araşdırmanın müəlliflərindən biri James Nash bildirir ki, ““Siz rəqəmsal obyekti birbaşa fiziki obyektlə təmasa keçirmiş kimi hiss edəcəksiniz. Bu, barmağınızı səthdə sürüşdürərək cihazı idarə etməyə imkan verən bugünkü şüşə əsaslı displeylərlə eyni üstünlükləri təklif edir”.
Tədqiqatın müəllifləri yeni texnologiyanı ilk öncə smartfonlarda tətbiq edərək sınaqdan keçirməyi düşünürlər. Lakin yeni displeylər avtomobillərdəki fiziki düymələri və ya əl konsollarında idarəetmə elementlərini əvəz edə bilər. Bundan əlavə, yeni texnologiya səhiyyə işçilərinin təlimlərində də istifadə oluna bilər. Səhiyyə işçiləri ekranın müqavimətini insan toxuması kimi hiss edə bilərlər. Başqa bir funksiya, məsafədəki insanlar arasında toxunma əlaqəsidir. Yəni, əmsöhbət barmağını ekrana qoyub, həmsöhbətin onun ekranına toxunub-toxunmamasından asılı olaraq onun hansı yumşaqlıqda və ya sərtlikdə müqavimət göstərdiyini hiss edə bilərlər. Tərtibatçılar bildirirlər ki, texnologiya hələ mükəmməl deyil və onun gündəlik həyata tətbiqi ən azı 10 il çəkə bilər.
