Windows əməliyyat sistemi ilə işləyən kompüterlər bu gün bazarın təqribi 75%-lik hissəsinə hakimlik edir. Müxtəlif qiymət səviyyələrində, fərqli xüsusiyyətlərə sahib kompüterlərdə istifadə edilən Windows, 36 il ərzində unikal seçimə çevrilə bilmişdir. Lakin bu o demək deyil ki, əməliyyat sisteminin hər yeni versiyası uğurlu olub. Microsoft tarixində Windows Longhorn, Windows Vista, Windows 8 kimi uğursuz əməliyyat sistemləri də zamanla qarşımıza çıxıb. Windows 8 əməliyyat sistemində start menyusundakı dəyişikliklər rəğbət görmədiyi üçün çıxdıqdan 4 il sonra yeniləmə dəstəyi kəsilmişdir. Windows 8.1 isə yenə az istifadəçi sayına baxmayaraq 2013-cü ildən bu yana Microsoft tərəfindən dəstəklənib. Ortaya çıxmış detallara görə isə Microsoft şirkəti Windows 8.1 dəstəyini sonlandırır.
Microsoft şirkəti Windows 8.1 əməliyyat sisteminə verilən yeniləmə dəstəyini nə vaxtdan sonlandırır?
Hal-hazırda Windows 8.1 bütün işlək Windows əməliyyat sistemlərinin 4,3%-lik hissəsini formalaşdırır. Bu rəqəm Windows 11, Windows 10, Windows 7 ilə müqayisədə çox aşağıdır. Verilmiş məlumata əsasən Microsoft, Windows 8.1 dəstəyini sonlandırır.
Belə ki, Microsoft yaxın vaxtlarda istifadəçilərinə mesaj göndərərək əməliyyat sisteminə verilən dəstək və təhlükəsizlik yeniləmələrinin 10 yanvar 2023-cü ildən etibarən dayandırılacağını bildirəcək. Sonuncu dəfə şirkət bu məzmunda bildirişi 2020-ci ildə Windows 7 istifadəçiləri üçün göndərmişdi. Bildirişin əsas məqsədi isə istifadəçiləri daha yeni əməliyyat sisteminə keçməklə bağlı xəbərdar etməkdir.
Texniki xüsusiyyətləri o qədər də güclü olmayan kompüterlərin böyük bir əksəriyyəti Windows 11 əməliyyat sistemini quraşdıra bilməyəcək. Təbii ki, tək alternativ Windows 10 olacaq. Windows 10 əməliyyat sisteminə keçdikdən sonra ən azından 2025-ci ilin oktyabr ayına qədər yeniləmə almağa davam edə biləcəksiniz.
Dəstəyin kəsilməsi isə kompüterinizin işləməyəcəyi mənası kəsb etmir. Əgər kompüterinizə yeniləmələri ümumiyyətlə yükləməyən birisinizsə bunun sizə heç bir təsiri olmayacaq. Necə ki, Windows 7 əməliyyat sistemli cihazlar hələ də işləyir, o şəkildə işlətməyə davam edə biləcəksiniz. Lakin təhlükəsizlik yeniləmələrinə önəm verən biri üçün Windows 8.1 ilə davam etmək uyğun olmayacaq. Digər bir tərəfdən Windows 8.1 əməliyyat sisteminə sahib kompüteriniz normal işləyirsə Windows 10 ilə böyük bir ehtimalla daha da yaxşı işləyəciyindən yüksəltmə etməyiniz məntiqlidir.
