Köhnə smartfonlar yavaş-yavaş zamanın tələbləri ilə ayaqlaşmaqda çətinlik çəkir. Yenilənmə almırlar, işləmə sürətləri yavaşıyır, bəzən də işləyən tətbiqlər işləməməyə başlayır. Təəssüf ki, indi də iPhone 5 seriyası modelləri bənzər vəziyyətlə qarşılaşmağın astanasındadır. Ortaya çıxmış məlumatlar iPhone 5 və iPhone 5c modellərinin WhatsApp tətbiqindən məhrum qalacağını göstərir.
WhatsApp yalnız iOS 12 və üzərində işləyə bilər
Tətbiqlər yeniləndikcə daha da mürəkkəbləşir. Ölçüsü artır, yeni xüsusiyyətlər qazanır və eyni zamanda təhlükəsizliyin artırılması zəruri hal alır. İllər əvvəl çıxmış smartfonlar həm texniki, həm proqram təminatı cəhətdən zəif qalırlar. Ona görə də yeniliklərin həmin cihazlar üçün uyğunlaşdırılması və optimizasiyası çətinləşir. Apple şirkətinə məxsus iPhone 5 və iPhone 5c modelləri də bu problemlərlə qarşı-qarşıyadır.
Belə ki, WABetainfo resursu WhatsApp tətbiqinə gətirilməsi planlaşdırılan yeniliklə bağlı məlumat yayıb. Bu ilin 24 oktyabr tarixindən etibarən iOS 10 və iOS 11 tətbiq dəstəyini itirəcək. Bu əməliyyat sistemləri hal-hazırda yuxarıda qeyd edilən iPhone 5 və iPhone 5c modellərini əhatə edir. iPhone 5s modelinin bura aid edilmədiyini xüsusilə qeyd etmək lazımdır. Çünki, iPhone 5s modelində iOS 10 və ya iOS 11 əməliyyat sistemləri mövcud deyil. Həmin model iOS 12 ilə təchiz edilib və ən azından bir il daha WhatsApp tətbiqini dəstəkləyəcək.
Əslində ötən ilin sonlarına doğru bənzər xəbərlər ortaya çıxmışdı. iPhone 5 seriyasından seçilmiş modellərin tətbiq dəstəyinin kəsiləcəyi deyilirdi. Lakin 2021-ci ildə belə bir şey baş tutmadı. Bu il 24 oktyabra təyin edilmiş tarixin isə dəqiq olduğu düşünülür. WhatsApp’ın iOS əməliyyat sisteminə aid beta variantında məhz həmin tarix faktiki olaraq göstərilir. Əgər hələ də bu iPhone 5, iPhone 5c modellərini işlədirsinizsə o vaxta qədər bu cihazlarınızı yenisi ilə əvəz etməyi düşünsəniz yaxşı olar. iPhone 5 modelinin təqdim edilməsindən 10 il vaxt keçib. 2012-ci ildən çevrilib bu gün satışda olan iPhone 13 seriyası modellərə baxdıqda inkişafın nə qədər möhtəşəm olduğunu görmək insanı heyrətləndirir. Ona görə də bu cihazlarda WhatsApp tətbiqinin işləməyəcəyinə görə məyus olmağa ehtiyac yoxdur.
