Smartfon bazarında müxtəlif brendlər daim kamera performansı cəhətdən bir-birləri ilə rəqabətə girirlər. Orta seqment cihazlar arasında bu rəqabət qiymətlərin ucuz olması səbəbilə çox yüksək deyil. Lakin flaqman modellərdə qiymət nisbətən arxa planda qaldığından istehsalçılar daha peşəkar kameralarla öz smartfonlarını təchiz etməyə maraqlıdırlar. Xiaomi şirkəti də ötən il təqdim etdiyi Xiaomi 11 Ultra modelində kamera performansını əhəmiyyətli dərəcədə artırmışdır. Xüsusilə Huawei brendinin zəifləməsi və innovativ kamera yenilikləri gətirməməsi digər brendlərin əlini daha da gücləndirib. İllərdir Huawei smartfonlarında kamera texnologiyalarına öz töhfəsini verən Leica fərqli bir brendlə əməkdaşlığa başlayır. Məlumdur ki, söhbət hansı brenddən gedir.
Xiaomi 12 Ultra iyulda təqdim edilə bilər
Bir müddət əvvəl MIUI interfeysinin qalareya tətbiqinin beta variantında ilk həqiqi Leica izləri ilə rastlaşımışdıq. Qaynaq kodlarındakı yeni rəng effektlərinin adında məhz Leica sözləri qeyd olunurdu. Lakin bununla bağlı ilkin iddialar ötən ilin sonlarından bəri Çinli mənbələr tərəfindən paylaşılır. Bu gün səhər saatlarında paylaşılan poster isə bütün bu iddialara son qoyaraq əməkdaşlığı rəsmi şəkildə təsdiqləyib.
Lei Jun bildirib ki, Xiaomi və Leica şirkətləri bir-birləri ilə öz araşdırma və fəlsəfələrini bölüşəcək. Sektor üzərindəki təsirlərini artıracaq. Xiaomi-nin kamera texnologiyası strategiyasına ciddi təsir göstərəcək. Kamera texnologiyasından tutmuş buna bağlı bir çox sahəyə misli görünməmiş təkan verəcək.
Paylaşılan posterdə modelin adından birbaşa bəhs edilmir. Amma modelin Xiaomi 12 Ultra olduğunu təxmin etmək o qədər də çətin deyil. Posterin mətnində “naməlum” modelin iyul ayında təqdim ediləcəyi qeyd olunub. Eyni zamanda smartfona Snapdragon 8+ Gen 1 çipsetinin quraşdırılacağı dəqiqdir. Bu barədə ötən çipsetin təqdimatı zamanı məlumat verilmişdi.
Sony istehsalı ən yeni IMX 9XX seriyası 50MP təsvir ölçülü kamera sensorunun da Xiaomi 12 Ultra modelində debüt etməsi və ya işlədilməsi ehtimallar arasındadır. Xiaomi 11 Ultra modelində şirkət Samsung istehsalı ISOCELL GN2 50MP sensorundan yana seçim etmişdi. Bu il 200MP təsvir ölçülü kameranın işlədiləcəyi gözlənilsə də böyük bir ehtimalla ISOCELL HP1 ideal nəticə göstərməyib. Leica ilə əməkdaşlıq kamera performansı cəhətdən şirkəti liderliyə yüksəldə bilərmi, bunu zaman göstərəcək.
