Bu ilki illik I/O tədbiri zamanı süni intellektlə təchiz edilmiş 20-dən çox məhsulu nümayiş etdirmək planları ilə yanaşı, həm də Google şirkəti 1000 fərqli dili dəstəkləyən AI dil modeli yaratmaq məqsədinə doğru irəliləyir. Ötən gün yayımlanan bir yeniləmədə Google, Universal Speech Model (USM) haqqında daha çox məlumat paylaşıb.
Keçən ilin noyabr ayında şirkət USM modelini açıqlayarkən dünyanın ən çox danışılan 1000 dilini dəstəkləyən dil modeli yaratmaq planlarını da açıqlamışdı. Google şirkəti USM-ni 300-dən çox dildə 12 milyon saat nitq və 28 milyard cümlə ilə öyrədilmiş 2 milyard parametrə malik “ən müasir nitq modelləri ailəsi” kimi təsvir edir. Hətta YouTube platformasının artıq subtitrlər yaratmaq üçün istifadə etdiyi USM avtomatik nitqin tanınmasını (ASR) dəstəkləyir.
Hal-hazırda Google, USM-nin 100-dən çox dili dəstəklədiyini və daha da geniş bir sistem qurmaq üçün təməl rolunu oynayacağını bildirir. Meta şirkəti hələ ilkin mərhələdə olan oxşar süni intellekt tərcümə aləti üzərində işləyir. Texnologiyanın tətbiqi sahələrindən biri artırılmış reallıq eynəklərinin istifadəsini genişləndirmək ola bilər. Oxşar konsepsiya variantını Google şirkəti keçən il I/O konfransı zamanı nümayiş etdirmişdi. Sistem real vaxt rejimində başqasının nitqini tərcümə edə, nəticələri birbaşa AR eynəklərinin ekranında göstərə bilər. Bununla belə, texnologiyanın son versiyasının ortaya çıxmasına hələ çox var və Google şirkəti utandıran xətalardan qaçmaq üçün çox çalışmalı olacaq.
