Nokia şirkətinin dizayn komandası Pure UI adlı yeni istifadəçi interfeysini təqdim etdi. Şirkət elan etdiyi yeni interfeysdən bazara çıxarmağı planlaşdırdığı digər məişət elektronikası cihazlarında, eləcə də Nokia smartfonlarında istifadə etməyi planlaşdırır.
Pure UI-də yeni rənglər, tipoqrafiya , animasiyalar, illüstrasiyalar və digər vizual dizayn elementləri var. Hətta ilk baxışdan sadə və minimalist interfeysin müxtəlif həllərə inteqrasiya oluna biləcəyini görə bilərsiniz.
Məsələn, Nokia şirkətinin dizaynerləri tərəfindən çəkilmiş düymələr asanlıqla ağıllı ev proqramında və ya hətta vebsaytda, eləcə də smartfon interfeysində istifadə edilə bilər. Şirkət ağ rəngdən əlavə mavi və açıq mavi çalarlarından da istifadə edib.
Yeni dizaynın ən mühüm komponenti incə, standart və qalın formalarda mövcud olan və bütün interfeys elementlərində istifadə olunan Nokia Pure şrifti kimi seçilir. Dizaynerlər həmçinin olduqca sadə və yüngül görünən bir çox yeni ikon da hazırlayıblar.
Nokia şirkətini yeni istifadəçi interfeysi qaranlıq rejimi dəstəkləyir. Yayımlanan şəkillərdə biz Pure UI interfeysinin təkcə smartfonlarda deyil, həmçinin vebsaytlarda və ağıllı ev cihazlarında da istifadə oluna biləcəyini görürük. Beləliklə, bu interfeys əslində geniş bir konsepti ifadə edir.
Xatırladaq ki, Nokia şirkəti indiyədək Android əməliyyat sisteminin standart interfeysindən istifadə etməyə üstünlük verib. Şirkət yeni dizayn dilini göstərsə də, cihazlarında Pure UI istifadə etməyə nə vaxt başlayacağı ilə bağlı heç bir açıqlama verməyib. Digər bir tərəfdən Pure UI interfeysinin hal-hazırda Nokia markalı smartfon istehsal edən HMD şirkəti ilə də əlaqəsi yoxdur. Çünki, interfeys hal-hazırda smartfon istehsalı ilə məşğul olmayan əsl Nokia şirkəti tərəfindən hazırlanıb. HMD şirkətinin interfeyslə bağlı hər hansı bir lisenziya varlığı bilinmir. Nokia rəsmi məqaləsində Nokia smartfonları terminindən istifadə etsə də, mənbələr bu bəndin şərti xarakter daşıdığını qeyd edirlər. Yəni, hal-hazırda bazarda olan HMD istehsalı modellərdə və yaxın gələcəkdə çıxacaq cihazlarda Pure UI əvəzinə stok Android görməyə davam edəcəyimiz gözlənilir.
