OnePlus brendinin flaqman smartfonları arasına OnePlus 9 seriyasına qədər hər il “T” uzantılı gücləndirilmiş modellər əlavə olunurdu. Hansı ki, cari ilin ikinci yarısında sürət aşırdılmış Snapdragon 8XX+ çipsetini əldə etmiş bu modellər OnePlus üçün zirvəni təmsil edirdi. Son dəfə OnePlus 8T seriyası təqdim edildikdən sonra 2 ilə yaxındır “T” uzantısına sahib smartfon görməmişik. Əslinə qalsa gətiriləcək lazımi yeniliklərin da az olması məsələn, OnePlus 9T Pro adlı bir modelin çıxarılmasına ehtiyac yaratmayıb. Lakin ortaya çıxmış yeni detallar göstərir ki, OnePlus yenidən “T” seriyasını bərpa etməyi planlaşdırır. HeyitsYogesh ləqəbli insayder tərəfindən onsitego əməkdaşlığında OnePlus 10T modelinə aid yeni render görüntüləri paylaşılıb.
OnePlus 10T modelinə aid olduğu iddia edilən render görüntülərini analiz etdikdə modelin dizaynında OPPO izlərini yaxından müşahidə etmək olur. Elə arxa tərəfə diqqət etsək kamera modulunun kənarlarında qapaq üzərində yaradılmış hündür adacıq OPPO K10 seriyasını xatırladır. Kamera sensorlarının düzülüşü və dizaynı OnePlus 10 Pro modelinə müəyyən qədər bənzəyir. Lakin OnePlus 10 Pro qədər “orijinal” OnePlus dizaynı hissiyatı yaşatmır.
OnePlus 10 Pro demişkən, OnePlus 10T modeli OP 10 Pro ilə müqayisədə bəzi xüsusiyyətlərinə görə geri qalacaq. Elə render görüntüsündəki düz ekran paneli belə bunu sübut edir. Mənbənin verdiyi məlumata görə smartfona 6.7 düym ölçülü FHD+ təsvir ölçülü 120Hz tezlikli AMOLED ekran paneli quraşdırılıb. Ölçüsü OnePlus 10 Pro ilə eynidir, amma keyfiyyət cəhətdən biraz zəif qalır. Smartfonun Dimensity 9000 çipsetinə sahib olacağı planlaşdırılsa da, hazırlıq prosesi zamanı Snapdragon 8+ Gen 1 çipseti ilə əvəzlənmə baş verib.
OIS ilə gücləndirilmiş 50MP əsas kamerası 16MP ultra-geniş bucaqlı, 2MP makro kameralarla tamamlanıb. 32MP selfi kamerasına malik olacaq və selfi kamerası mərkəzə yerləşdiriləcək. Üstəlik OnePlus 10T modelində 4K keyfiyyətdə 60FPS videoların arxa kamera ilə qeydə alınmasının mümkünlüyü barədə də bəhs edilir.
4800mAh batareyası 150W sürətli doldurma dəstəkləyəcək. Təqdimat tarixi məlum deyil. Android 12 üzərində OxygenOS 12 interfeysi ilə qutudan çıxacaq. Yəqin ki, iyul ayının sonuna qədər təqdimat baş tutacaq.
